YouTubedagi “Daryo Lifestyle” kanalida o‘zbek xonandalari ichida birinchi marta Italiyaning eng mashhur “La skala” teatri bilan ikki yillik shartnoma imzolagan professional xonanda Aqlbek Piyazov bilan suhbat tashkil qilindi. Xonanda akasi sabab operaga mehri uyg‘ongani, xalqaro tanlovlardagi ishtiroki va mashhur teatr bilan shartnoma imzolash jarayonlari haqida gapirdi.
— Bir oilaning ikki vakili operaga mehr qo‘yishining sababi nimada?
— Katta bobom Ziynel Piyazov dramatik aktyor bo‘lsa-da, ovozi nihoyatda jarangdor va salobatli bo‘lgan. U xalq artisti darajasiga erishib, hamisha bosh rollarni ijro etgan. Dadam ham teatrning xor jamoasida faoliyat yuritgan. Keyinchalik do‘mbira bilan milliy qo‘shiqlarni ham ijro etgan. Oilamizda sanʼatkorlar juda ko‘p, ammo akamgacha ularning hech biri opera yo‘nalishida ijod qilmagan.
Avvaliga milliy estrada xonandasi bo‘lishni niyat qilgandim. Ammo ovozimni eshitib ko‘rgan ustozlar aynan akamdek opera yo‘nalishida ijod qilishimni maslahat berishdi. Keyinchalik bunga o‘zim ham qiziqib ketdim. Hozir hayotimni operasiz tasavvur qilolmayman.
— Opera xonandasi bo‘lishning mashaqqati nimada?
— Boshqa xonandalar kuylash jarayonida improvizatsiya qilishi mumkin. Ammo 150 talik orkestr ham kompozitor yaratgan musiqiy asarni chaladi. Opera xonandasi ham belgilangan meʼyorlardan chiqmagan holda uni ijro etishi kerak. Italyan tilini bilishi, notalarni mukammal o‘rganish va asarni to‘liq yodlagan bo‘lishi kerak. Masalan, birgina Juzeppe Verdining “Rigoletto” operasini oladigan bo‘lsak, unda qancha personaj ishtirok etadigan bo‘lsa, opera xonandasi ularning har birini yaxshi bilishi shart.
Bundan tashqari, operani ijro etish xonandadan katta kuch va doimiy rejimga eʼtibor berishni talab etadi.
— Ko‘plab xalqaro tanlovlarda ishtirok etgansiz. Ularda ishtirokchilar qanday rag‘batlantiriladi?
— Opera xonandalari o‘rtasida juda ko‘p tanlovlar o‘tkaziladi. Eng yaxshi tomoni, ularning ko‘pchiligida yosh chegaralanmaydi. G‘oliblarga yaxshigina gonorar berilgani uchun ham hamisha qiziqish yuqori bo‘ladi. Tanlovlarda ishtirok etib olgan eng ko‘p gonorarim 20 ming AQSH dollari bo‘lgan. Eng kami esa 5 ming AQSH dollari. Opera xonandasi yiliga ikkita tanlovda g‘olib bo‘lsa ham yaxshigina daromad topadi. Quvonarlisi, bunday tanlovlar O‘zbekistonda ham tashkil etilyapti.
— Alisher Navoiy nomidagi opera va balet teatriga ishga kirganingizga ko‘p vaqt bo‘lgani yo‘q. Bilishimcha, u yerga ham uzoq vaqt stajyor bo‘lib ishlagan ekansiz.
— O‘zbekiston davlat konservatoriyasining bakalavr va magistratura bosqichlarini tamomlagandan keyin ham o‘zimni teatrga ishlashga loyiq deb bilmadim. Shu bois Italiyada o‘qishni davom ettirishga qaror qildim. Chunki xalqaro tanlovlarda ishtirok etganimda ko‘pchilik ustozlar menga Italiyada o‘qishni maslahat berishgandi. Ikki yil davomida tahsil oldim, ammo oson kechgani yo‘q. U paytda italyan tilini yaxshi bilmasdim, buning ustiga oilam va ikki farzandim bor edi. Ammo sabr bilan bilimimni mustahkamlab, o‘qishni bitirdim. O‘zbek opera va balet teatrida kuylashni boshlaganimda kutilmaganda Italiyaning “La skala” teatri bilan ikki yillik shartnoma imzoladim. Akam ham bu teatrda sahnasida kuylagan, ammo shartnoma asosida ishlash baxti nasib etmagandi. “Yoshim katta bo‘lib qolgani uchun ishga olishmagandi”, deb afsuslanardi. Bu baxt menga nasib etganidan xursandman, deydi Aqlbek Piyazov.
Opera xonandasi bilan bo‘lgan suhbatni YouTube’dagi “Daryo Lifestyle” kanalida tomosha qilishingiz mumkin.
Izoh (0)