O‘zbekistonda 2025-yil yanvar-iyul oylarida inflyatsiya darajasi 4 foizni tashkil etdi. Bu haqda Statistika qo‘mitasi tahlilida keltirilgan.
Mamlakatda tovar va xizmatlar narxlari 2024-yil dekabridan joriy yil iyuligacha 4 foizga qimmatlashgan. Yetti oy mobaynida oziq-ovqat mahsulotlari narxi 0,6 foiz, nooziq-ovqatlar 3,3 foiz, xizmatlar qiymati 11,7 foizga oshgan.
“Bo‘limlar kesimida inflyatsiya diapazoni 2024-yil dekabriga nisbatan 0,1 foizdan (“Sug‘urtalash va moliyaviy xizmatlar”) 14,8 foizgacha (“Uy-joy xizmatlari, elektr energiyasi, gaz va boshqa yoqilg‘i turlari”) chegarasida bo‘ldi”, deyiladi manbada.
Taqqoslash uchun, 2023-yil yanvar-iyul oylarida inflyatsiya 3,3 foiz, 2024-yil mos davrida 4,9 foiz bo‘lgan.
Qo‘mita tahliliga qaraganda, iyul oyida O‘zbekistondagi yillik inflyatsiya darajasi 8,9 foizni tashkil etgan. Markaziy bank o‘tkazgan so‘rovda esa aholiga sezilgan inflyatsiya 13,3 foiz bo‘lgan.
2019-yildagi prezident farmoni bilan O‘zbekistonda inflyatsiya bo‘yicha doimiy maqsad (target) 5 foiz etib belgilangan. Mazkur maqsadga erishish vazifasi Markaziy bank zimmasiga yuklatilgan.
Farmonda regulyatorga inflyatsiyani 2021-yilda 10 foizga pasaytirishi, 2023-yilda esa 5 foiz darajasiga tushirishi vazifasi qo‘yilgan. Biroq bu maqsad emas, yetib bo‘lmayotgan orzuga aylanayotgandek.
Bugungacha inflyatsiya targetiga yetish muddatlari olti martagacha o‘zgartirildi. Markaziy bank 2020-yildan inflyatsion targetlashga o‘ta boshlagan. O‘sha paytda doimiy inflyatsiya maqsadi — 5 foizga 2023-yilga kelib erishilishi belgilangan. 2022-yilda 5 foizlik targetga erishish muddatini 2024-yil oxiriga, 2023-yilda esa bu muddat 2025-yil ikkinchi yarmiga ko‘chirilgan. 2024-yil oktyabrda muddat to‘rtinchi bor o‘zgartirilgan. Yaʼni maqsadga 2026-yilning ikkinchi yarmida yetilishi aytilgan.
Joriy yil may oyida targetga yetishning navbatdagi yangi muddati eʼlon qilinib, inflyatsiya darajasi 2027-yilda 5 foizga pasayishi bildirilgan. Iqtisodiyot va moliya vazirligi Fiskal strategiyasida esa muddat yettinchi bor keyinga qoldirildi. Hujjatda endi mamlakatda 5 foizlik inflyatsiyaga 2028-yilga boribgina erishish mumkinligi yozilgan.
Izoh (0)