Ўзбекистонда 2025 йил январь-июль ойларида инфляция даражаси 4 фоизни ташкил этди. Бу ҳақда Статистика қўмитаси таҳлилида келтирилган.
Мамлакатда товар ва хизматлар нархлари 2024 йил декабридан жорий йил июлигача 4 фоизга қимматлашган. Етти ой мобайнида озиқ-овқат маҳсулотлари нархи 0,6 фоиз, ноозиқ-овқатлар 3,3 фоиз, хизматлар қиймати 11,7 фоизга ошган.
“Бўлимлар кесимида инфляция диапазони 2024 йил декабрига нисбатан 0,1 фоиздан (“Суғурталаш ва молиявий хизматлар”) 14,8 фоизгача (“Уй-жой хизматлари, электр энергияси, газ ва бошқа ёқилғи турлари”) чегарасида бўлди”, дейилади манбада.
Таққослаш учун, 2023 йил январь июль ойларида инфляция 3,3 фоиз, 2024 йил мос даврида 4,9 фоиз бўлган.
Қўмита таҳлилига қараганда, июль ойида Ўзбекистондаги йиллик инфляция даражаси 8,9 фоизни ташкил этган. Марказий банк ўтказган сўровда эса аҳолига сезилган инфляция 13,3 фоиз бўлган.
2019 йилдаги президент фармони билан Ўзбекистонда инфляция бўйича доимий мақсад (таргет) 5 фоиз этиб белгиланган. Мазкур мақсадга эришиш вазифаси Марказий банк зиммасига юклатилган.
Фармонда регуляторга инфляцияни 2021 йилда 10 фоизга пасайтириши, 2023 йилда эса 5 фоиз даражасига тушириши вазифаси қўйилган. Бироқ бу мақсад эмас, етиб бўлмаётган орзуга айланаётгандек.
Бугунгача инфляция таргетига етиш муддатлари олти мартагача ўзгартирилди. Марказий банк 2020 йилдан инфляцион таргетлашга ўта бошлаган. Ўша пайтда доимий инфляция мақсади — 5 фоизга 2023 йилга келиб эришилиши белгиланган. 2022 йилда 5 фоизлик таргетга эришиш муддатини 2024 йил охирига, 2023 йилда эса бу муддат 2025 йил иккинчи ярмига кўчирилган. 2024 йил октябрда муддат тўртинчи бор ўзгартирилган. Яъни мақсадга 2026 йилнинг иккинчи ярмида етилиши айтилган.
Жорий йил май ойида таргетга етишнинг навбатдаги янги муддати эълон қилиниб, инфляция даражаси 2027 йилда 5 фоизга пасайиши билдирилган. Иқтисодиёт ва молия вазирлиги Фискал стратегиясида эса муддат еттинчи бор кейинга қолдирилди. Ҳужжатда энди мамлакатда 5 фоизлик инфляцияга 2028 йилга борибгина эришиш мумкинлиги ёзилган.
Изоҳ (0)