Toshkent viloyati Keles tumanida 3 kunlik kelinchak o‘z joniga qasd qilib vafot etdi. Bu haqda “Millar” dasturida xabar berildi.
2025-yil 3-aprel kuni qiz Toshkent viloyatining Keles shahriga turmushga uzatilgan. Onasining so‘zlariga ko‘ra, qiz baxtli edi va turmush qurishga o‘zi rozi bo‘lgan. Biroq to‘ydan uch kun o‘tib, 6-aprel kuni qizining jasadi oila a’zolariga topshirilgan. U o‘zini osgan holda topilgan.
Marhumaning onasi yolg‘iz qizi o‘z joniga qasd qiladigan holatda bo‘lmaganini, hayotdan xursand yurganini aytib, u bo‘g‘ib o‘ldirilganini taxmin qilmoqda. Qaynona esa o‘lim vaqtida uyda hech kim bo‘lmaganini bildirib, kelin o‘z joniga qasd qilganini da’vo qilgan.
“Qizim o‘zini o‘ldirmagan uni bo‘g‘ib qiynab o‘ldirishgan. Aybdorlarga jazo berilmas ekan kerak bo‘lsa qizimni qabrini ochirib qayta tekshirtiraman...” deydi qizning onasi.
Bosh prokuratura matbuot xizmatining ma’lum qilishicha, marhumaning vafoti yuzasidan olib borilgan tergovga qadar tekshiruv harakatlarida biror-bir shaxsning xatti-harakatlarida jinoyat alomatlari aniqlanmagani sababli jinoyat ishini qo‘zg‘atishni rad etish haqida qaror qabul qilingan.
2024-yilning mart oyida Samarqandda 22 yoshli kelin o‘zini 7-qavatdan tashlab vafot etgandi. O‘sha yilning fevralida Andijon viloyati Oltinko‘l tumanida 21 yoshli kelin o‘z joniga qasd qilgani yuzasidan uning eri aybdor deb topilib, o‘zini o‘zi o‘ldirish darajasiga yetkazish moddasi bilan 9 yil 3 oy muddatga ozodlikdan mahrum qilingandi.
Izoh (0)