O‘zbekiston va Bahrayn tashqi ishlar vazirlari Diplomatik pasport egalari uchun vizalarni bekor qilish to‘g‘risidagi bitimni imzoladi.
Tashqi ishlar vaziri Baxtiyor Saidov Manamaga rasmiy tashrifi doirasida Bahrayn tashqi ishlar vaziri Abdullatif bin Rashid al-Zayani bilan uchrashdi. Uchrashuvda diplomatik pasport egalari uchun vizalarni bekor qilish to‘g‘risidagi bitim imzolangan.
“Bahrayn Podshohligi tashqi ishlar vaziri Abdullatif bin Rashid al-Zayani janoblari va uning jamoasi bilan juda samimiy va samarali uchrashuv o‘tkazdik. Muzokaralarimiz davomida O‘zbekiston va Bahrayn o‘rtasidagi sheriklikni yanada mustahkamlash — siyosiy muloqotni kengaytirishdan tortib savdo, investitsiyalar va institutsional tajriba almashishni ko‘paytirishgacha bo‘lgan masalalar yuzasidan fikr almashdik.
Mintaqaviy va global hamkorlikning eng dolzarb masalalarini ko‘rib chiqdik. Markaziy Osiyo va Ko‘rfaz davlatlari o‘rtasidagi ko‘priklarni mustahkamlashga alohida eʼtibor qaratdik. Shuningdek, diplomatik pasport egalari uchun vizalarni bekor qilish to‘g‘risidagi bitimni imzoladik. Hamkorligimiz zamirida yotgan do‘stlik va o‘zaro hurmat ruhini yuksak qadrlaymiz. Bugungi muhokamalarimizga asoslanib, umumiy g‘oyalarimizni har ikki mamlakatimiz manfaatiga xizmat qiladigan aniq tashabbuslarga aylantirishni intiqlik bilan kutamiz”, deb yozdi O‘zbekiston TIV rahbari.
Izoh (0)