Hindistonda ayol Google xaritasi xatosi tufayli mashinada kanalga tushib ketdi (video)

Hindistonning Mumbay shahrida ayol haydovchi Google Maps ko‘rsatmasiga amal qilgan holda mashinasini suv to‘la jarlikka haydab yubordi. Bu haqda Gulf News xabar berdi.

Ma’lumotlarga ko‘ra, ayol xaritada ko‘rsatilgan yo‘nalishga rioya qilgan, biroq Google uni Belapurdagi Bay ko‘prigi ustiga emas, balki uning pastidan o‘tuvchi “mavjud bo‘lmagan” yo‘lga yo‘naltirgan. Oqibatda u nima bo‘layotganini tushunib ulgurmasdan avtomobili kanalga tushib ketgan.

Voqea joyida bo‘lgan dengiz xavfsizlik xizmati xodimlari tezda yordamga yetib kelgan. Ayol bir necha daqiqada qutqarilgan va tan jarohati olmagani bildirilgan. Keyinroq avtomobil kran yordamida suvdan chiqarib olingan. Voqea joyidan olingan videolarda oq rangli avtomobilning jarlikdan ko‘tarib olinayotgani ko‘rinadi.

Google Maps bilan bog‘liq ko‘ngilsiz hodisalar ko‘p

So‘nggi yillarda Google xaritasi noto‘g‘ri ko‘rsatgan yo‘nalishlar sabab bir qancha fojiali yoki xavfli holatlar qayd etilgan. Jumladan:

1. Uttar Pradesh, 2024-yil — uzoq muddat avariya holatida bo‘lgan ko‘prikka kirib borgan mashina Ramganga daryosiga qulab tushib, 3 kishi halok bo‘lgan.
2. Nepal—Goraxpur yo‘li, 2025-yil — GPS tugallanmagan yo‘lni ko‘rsatib, avtomobil deyarli uchib tushishiga oz qolgan.
3. Kerala shtatida sayohatchilar kuchli yomg‘ir paytida navigatsiyaga to‘liq ishonib, soyga kirib ketgan.
4. Bengalurulik yo‘lovchi, 2024-yil — Google xaritasi vaqtni noto‘g‘ri hisoblagani bois yo‘lovchi reysini o‘tkazib yuborgan.
5. Kerala to‘y mojarosi — kuyovning qarindoshlari GPS tufayli noto‘g‘ri ibodatxonaga, ya’ni asl manzildan 60 km uzoqlikka borib qolgan.

GPS ham doim ham ishonchli emas

Texnologiyalar hayotni osonlashtirsa-da, ularni mutlaqo xatosiz deb bo‘lmaydi. Ayniqsa, infratuzilmasi yaxshi ko‘rsatilmagan hududlar, qurilishi tugallanmagan yo‘llar yoki yomon ob-havo sharoitida bunday navigatsiyalarga to‘liq tayanish xavfli.

Mutaxassislar haydovchilarga yo‘nalishni iloji boricha tekshirib chiqishni, GPS’ga to‘liq ishonmaslikni, ayniqsa tunda yoki notanish hududlarda ehtiyotkorlikni oshirishni tavsiya qilmoqda.