Andijon viloyatining Buloqboshi tumanida 8-may kuni Farg‘ona kanali qirg‘og‘i o‘pirilib, suv toshib chiqdi. Holat aks etgan videolar ijtimoiy tarmoqlarda tarqaldi.
Unda suv katta tezlikda qirg‘oqdan chiqayotganini, buning oqibatida yon-atrofdagi mahallalarni suv bosganini ko‘rish mumkin.
FVV matbuot xizmatining ma’lum qilishicha, Buloqboshi tumani “Sarvontepa” MFY hududidan oqib o‘tuvchi Janubiy Farg‘ona kanali qirg‘oqlarining biriga shikast yetgani natijasida ma’lum miqdorda suv sizib chiqqan.
Ushbu maʼlumot olinishi bilan Norin-Qoradaryo irrigatsiya tizimlari boshqarmasi tomonidan suv butkul to‘xtatilgan. Hozirda Andijon viloyati FVB rahbariyati tomonidan kerakli bo‘lgan barcha kuch va vositalar sodir bo‘lgan hodisani bartaraf etish uchun jalb etilgan va vaziyat to‘liq nazoratga olingan.
“O‘zgidromet” matbuot xizmati axborotiga ko‘ra, talofatlar o‘rganilganda, jami 560 ta xonadonni suv bosgani ma’lum bo‘ldi.
FVV matbuot xizmati hozirda vazirlik va boshqa hamkor tashkilotlarning texnikalari yordamida suv oqimini pasaytirish va kirgan suvlarni chiqarib tashlash ishlari olib borilayotganini bildirdi.
“O‘zbekgidroenergo” AJ Janubiy Farg‘ona magistral kanalining bosh qismida suv sarfi to‘liq to‘xtatilganini, hozirda masʼullar tomonidan barcha zaruriy xavfsizlik chora-tadbirlari olib borilib, kanaldagi suv oqimlarini xavfsiz o‘tkazish jarayonlari taʼminlanayotganini ma’lum qildi.
“Hudud aholisini ortiqcha vahimaga berilmaslikka va xotirjamlikka chaqirib qolamiz”, deyiladi xabarda
Andijon viloyati hokimligi matbuot xizmatining xabar qilishicha, hozirda viloyat hokimi boshchiligidagi mutasaddi tashkilotlar ishtirokida ishchi guruh tashkil qilinib, holat bartaraf etilmoqda.
Barcha kerakli texnika vositalari jalb qilinib, jarayon nazoratga olindi.
Izoh (0)