FIFA reytingining iyul oyidagi yangilanishidan so‘ng, Temur Kapadze boshchiligidagi O‘zbekiston terma jamoasi Osiyodagi eng qimmat milliy jamoaga aylandi. Bu borada O‘zbekiston Yaponiya va Janubiy Koreya terma jamoalarini ortda qoldirdi.
Ma’lumotlarga ko‘ra, iyuldagi yangilanishdan keyin O‘zbekiston termasining umumiy narxi 69,58 million yevroga teng deb baholangan. Ikkinchi o‘rinni Birlashgan Arab Amirliklari egallagan bo‘lib, Transfermarkt portaliga ko‘ra, amirliklar jamoasining narxi 50,90 million yevroni tashkil etadi. Kuchli uchlikni esa 36,13 million yevro qiymat bilan Avstraliya yakunlab bergan.
Osiyoning elita terma jamoalari hisoblangan Yaponiya va Janubiy Koreya bu safar pastroqda qayd etilgan. Yaponiyaning umumiy qiymati 26,13 million yevro, Janubiy Koreyaniki esa 18,08 million yevro deb ko‘rsatilgan.
Xo‘sh, O‘zbekiston nimaning hisobiga Osiyoning eng qimmat terma jamoasiga aylandi?
Transfermarkt portalidagi terma jamoalar qaydnomasiga nazar tashlasak, Yaponiyaning asosiy futbolchilari — Takefusa Kubo, Hiroki Ito, Sion Suzuki, Daichi Kamada va Kaoru Mitoma kabilar tarkibga kiritilmagan. Janubiy Koreya tarkibida ham xuddi shunday holat: xususan, Son Xyon Min va Kim Min Jae kabi yulduzlar “Osiyo Yo‘lbarslari” ro‘yxatida yo‘q.
Qolaversa, bu futbolchilarning hech biri jarohat olmagan va terma jamoada o‘ynashni to‘xtatganlari haqida rasmiy ma’lumot yo‘q. Transfermarkt ularni nega qaydnomaga kiritmagani — noma’lum.
Mazkur holat yuzasidan sport sharhlovchisi Alisher Nikimbayev quyidagicha fikr bildirdi:
Ro‘yxatni ochib ko‘rganimda hayron bo‘ldim — Yaponiya tarkibida atigi bir nafar legioner, Koreyada esa bu ko‘rsatkich uch nafarni tashkil qiladi. Eng ajablanarlisi — ro‘yxatda na Son Xyon Min, na Li Kang In bor. Holbuki, shu ikki futbolchining o‘ziyoq Transfermarkt’da 45 million yevro turadi (Son — 20 mln, Li — 25 mln).
Nikimbayevning ta’kidlashicha, bu holat ehtimol yaqinda o‘tkazilgan Sharqiy Osiyo Kubogida ishtirok etgan ikkinchi tarkiblar hisobga olingani bilan bog‘liq bo‘lishi mumkin:
Transfermarkt ehtimol haqiqiy milliy jamoalarni emas, balki yaqinda o‘tgan Sharqiy Osiyo Kubogida o‘ynagan zaxira tarkiblarni hisobga olgan. Shu sababli ular past baholangan bo‘lishi mumkin. Misol uchun, Yaponiya terma jamoasining Indoneziyaga qarshi so‘nggi rasmiy o‘yinidagi tarkibni olaylik — u yerda “Parma” darvozaboni Sion Suzuki va “Frayburg” yarim himoyachisi Yuito Suzuki bor edi. Ularning umumiy narxi o‘ziyoq 30 million yevro atrofida.
Nikimbayev so‘zini mashhur iqtibos bilan yakunladi:
Sobiq Britaniya bosh vaziri Benjamin Disraeli bejiz aytmagan: ‘Yolg‘onning uch turi bor: oddiy yolg‘on, ochiq-oydin yolg‘on va statistika’. Transfermarkt reytingi, aftidan, aynan uchinchi toifaga kiradi, deya xulosa qilgan Nikimbayev o‘zining Telegram kanalida.
Ma’lumot uchun, O‘zbekiston o‘z tarixida ilk marta Jahon chempionati yo‘llanmasini qo‘lga kiritdi. Jamoaning eng qimmat futbolchisi Abduqodir Husanov bo‘lib, uning qiymati 35 million yevroga baholangan.
Izoh (0)