FIFA рейтингининг июль ойидаги янгиланишидан сўнг, Темур Кападзе бошчилигидаги Ўзбекистон терма жамоаси Осиёдаги энг қиммат миллий жамоага айланди. Бу борада Ўзбекистон Япония ва Жанубий Корея терма жамоаларини ортда қолдирди.
Маълумотларга кўра, июлдаги янгиланишдан кейин Ўзбекистон термасининг умумий нархи 69,58 миллион еврога тенг деб баҳоланган. Иккинчи ўринни Бирлашган Араб Амирликлари эгаллаган бўлиб, Transfermarkt порталига кўра, амирликлар жамоасининг нархи 50,90 миллион еврони ташкил этади. Кучли учликни эса 36,13 миллион евро қиймат билан Австралия якунлаб берган.
Осиёнинг элита терма жамоалари ҳисобланган Япония ва Жанубий Корея бу сафар пастроқда қайд этилган. Япониянинг умумий қиймати 26,13 миллион евро, Жанубий Кореяники эса 18,08 миллион евро деб кўрсатилган.
Хўш, Ўзбекистон ниманинг ҳисобига Осиёнинг энг қиммат терма жамоасига айланди?
Transfermarkt порталидаги терма жамоалар қайдномасига назар ташласак, Япониянинг асосий футболчилари — Такефуса Кубо, Ҳироки Ито, Сион Сузуки, Даичи Камада ва Каору Митома кабилар таркибга киритилмаган. Жанубий Корея таркибида ҳам худди шундай ҳолат: хусусан, Сон Хён Мин ва Ким Мин Жаэ каби юлдузлар “Осиё Йўлбарслари” рўйхатида йўқ.
Қолаверса, бу футболчиларнинг ҳеч бири жароҳат олмаган ва терма жамоада ўйнашни тўхтатганлари ҳақида расмий маълумот йўқ. Transfermarkt уларни нега қайдномага киритмагани — номаълум.
Мазкур ҳолат юзасидан спорт шарҳловчиси Алишер Никимбаев қуйидагича фикр билдирди:
Рўйхатни очиб кўрганимда ҳайрон бўлдим — Япония таркибида атиги бир нафар легионер, Кореяда эса бу кўрсаткич уч нафарни ташкил қилади. Энг ажабланарлиси — рўйхатда на Сон Хён Мин, на Ли Канг Ин бор. Ҳолбуки, шу икки футболчининг ўзиёқ Transfermarkt’да 45 миллион евро туради (Сон — 20 млн, Ли — 25 млн).
Никимбаевнинг таъкидлашича, бу ҳолат эҳтимол яқинда ўтказилган Шарқий Осиё Кубогида иштирок этган иккинчи таркиблар ҳисобга олингани билан боғлиқ бўлиши мумкин:
Transfermarkt эҳтимол ҳақиқий миллий жамоаларни эмас, балки яқинда ўтган Шарқий Осиё Кубогида ўйнаган захира таркибларни ҳисобга олган. Шу сабабли улар паст баҳоланган бўлиши мумкин. Мисол учун, Япония терма жамоасининг Индонезияга қарши сўнгги расмий ўйинидаги таркибни олайлик — у ерда “Парма” дарвозабони Сион Сузуки ва “Фрайбург” ярим ҳимоячиси Юито Сузуки бор эди. Уларнинг умумий нархи ўзиёқ 30 миллион евро атрофида.
Никимбаев сўзини машҳур иқтибос билан якунлади:
Собиқ Британия бош вазири Бенжамин Дисраэли бежиз айтмаган: ъЁлғоннинг уч тури бор: оддий ёлғон, очиқ-ойдин ёлғон ва статистикаъ. Transfermarkt рейтинги, афтидан, айнан учинчи тоифага киради, дея хулоса қилган Никимбаев ўзининг Telegram каналида.
Маълумот учун, Ўзбекистон ўз тарихида илк марта Жаҳон чемпионати йўлланмасини қўлга киритди. Жамоанинг энг қиммат футболчиси Абдуқодир Ҳусанов бўлиб, унинг қиймати 35 миллион еврога баҳоланган.
Изоҳ (0)