2027-yil 1-yanvardan Iqtisodiyot va moliya vazirligi huzuridagi G‘aznachilik qo‘mitasi va Pensiya jamg‘armasining tuman (shahar) bo‘limlari tugatiladi. Bu bo‘yicha prezident farmoni qabul qilingan.
Farmonda yozilishicha, O‘zbekistonda ish haqi, pensiya, nafaqa va stipendiyalarning 90 foizdan ortig‘i bank kartalari orqali to‘lanyapti. G‘aznachilik xizmati qo‘mitasi va Pensiya jamg‘armasi shtat birliklari soni oxirgi ikki yilda 1 940 taga (45 foiz) qisqartirildi. Kelgusi yilda xodimlar sonini yana to‘rt barobargacha qisqartirish ko‘zda tutilgan.
Ikki tashkilot faoliyatida raqamlashtirish keng joriy etilgani hisobiga quyi bo‘g‘inlar xodimlari kamayib boradi. Qo‘mita va jamg‘arma hududiy boshqarmalarida har bir tuman va shaharda 1–3 shtat birligidan iborat ixcham xizmat ko‘rsatish ofislari ochiladi.
Farmon asosida 2026-yil 1-iyuldan boshlab mamlakatda Raqamli g‘azna tizimi joriy etiladi. Tizim sunʼiy intellekt yordamida maʼlumotlarni tahlil qiladi, prognozlar ishlab chiqadi va g‘aznachilik operatsiyalarida inson omilini kamaytiradi.
O‘z navbatida chet el valyutasidagi operatsiyalarni raqamlashtirgan holda amalga oshirish uchun Davlat moliyasini boshqarish axborot tizimini Butunjahon banklararo moliyaviy telekommunikatsiyalar hamjamiyati (SWIFT) tizimiga integratsiya qilish bilan shug‘ullanadi.
Raqamli g‘azna davlat xaridlari va to‘lov operatsiyalarini amalga oshirish jarayonida yuzaga kelishi mumkin bo‘lgan qonunchilik buzilishi bilan bog‘liq moliyaviy xavflarni avtomatik aniqlaydi. Buning uchun “E-risk” dasturiy majmuasi yordam beradi. Aniqlangan xavflar asosida ogohlantirish hamda xabardor qilish mexanizmini joriy qilinadi.
2026-yil 1-dekabrdan boshlab pensiya tizimida fuqarolarning mavjud ish staji va ish haqlari to‘g‘risidagi elektron maʼlumotlarga asosan pensiya miqdorlarini oldindan aniqlash bo‘yicha “Mening pensiyam” onlayn xizmati joriy etiladi. Tizim yordamida pensiya taʼminotiga oid barcha xizmatlar to‘liq proaktiv, elektron hamda interaktiv shaklga o‘tkaziladi.
Izoh (0)