Shoirning she’ridan ruxsatsiz foydalangan yana bir xonanda Jaloliddin Ahmadaliyev jarimaga tortildi. Bu haqda Adliya vazirligi xabar berdi.
Keltirilishicha, Adliya vazirligi tomonidan muallif Shoxrux Abduvoxidovga tegishli bo‘lgan “Yurak”, “Meni deb oqardi sochlaring ona”, “Ko‘zlaringni qizg‘anma mendan” va “Barchasini Xudoga soldim” nomli she’rlar ijrochi Jaloliddin Ahmadaliyev tomonidan huquq egasi ruxsatisiz hamda tegishli tartibda shartnoma tuzmasdan foydalanilgani aniqlandi.
Holat yuzasidan huquqbuzarga nisbatan Ma’muriy javobgarlik to‘g‘risidagi kodeksning 177 prim 1-moddasi bilan ma’muriy huquqbuzarlik to‘g‘risidagi bayonnoma rasmiylashtirilib, tegishli sudga yuborildi.
Farg‘ona viloyati jinoyat ishlari bo‘yicha Dang‘ara tuman sudining qaroriga ko‘ra, huquqbuzarga nisbatan Ma’muriy javobgarlik to‘g‘risidagi kodeksning 177 prim 1-moddasining birinchi qismi bilan jarima jazosi tayinlandi.
Ma’lumot uchun, qonunchilikka muvofiq muallif huquqbuzardan zarar qoplanishi o‘rniga bazaviy hisoblash miqdorining 20 baravaridan 1000 baravarigacha miqdorda tovon to‘lashini talab qilishga haqli hisoblanadi.
Xonanda 2022-yilda ham mualliflik huquqini buzganlikda ayblanib, “Ayyor do‘stlarim” qo‘shig‘ining she’ri muallifiga 26 mln so‘m jarima to‘lagan edi.
Mualliflik huquqi buzilishi bilan bog‘liq boshqa holatlar
19-iyunda shoirning she’ridan ruxsatsiz foydalangan yana bir xonanda Farrux Xamrayev jarimaga tortilgandi. Xonanda Feruza Karimova qo‘shiq ijrosida she’rdan ruxsatsiz foydalangani uchun muallifga 40 million so‘mdan ortiq pul to‘lashi belgilangandi. Rayhonning “Yaxshimasmi” qo‘shig‘ida she’rdan muallif ruxsatisiz foydalanilgani aniqlangandi. Manzura va Murodjon Yo‘ldoshev “Azizim” qo‘shig‘ini muallif ruxsatisiz kuylagani maʼlum bo‘lgandi.
Izoh (0)