“Inter Mayami” hujumchisi Lionel Messi Amerika Qo‘shma Shtatlari Oliy ligasi (MLS)ning navbatdagi turi doirasidagi “Nyu-Inglend Revolyushn”ga qarshi bahsda (2:1) dubl qayd etdi. Ushbu natija orqali u liga tarixida ketma-ket to‘rtta uchrashuvda ikki yoki undan ortiq gol urgan birinchi futbolchiga aylandi.
Messi 25-maydan beri o‘zi ishtirok etgan to‘rtta o‘yinda quyidagi natijalarni qayd etgan:
- “Klub de Fut Monreal” – 2 gol, 1 assist (4:1)
- “Kolambus Kreyu” – 2 gol, 2 assist (5:1)
- “Monreal” – 2 gol, 1 assist (4:2)
- “Nyu-Inglend Revolyushn” – 2 gol (2:1)
Ushbu davr mobaynida Messi jami 8 ta gol va 4 ta assist bilan ishtirok etdi.
“Nyu-Inglend”ga qarshi uchrashuvda urilgan gollardan biri uzoq masofadan kiritilgan bo‘lib, shu orqali Messi professional faoliyati davomida jarima maydoni tashqarisidan (to‘g‘ridan-to‘g‘ri jarima zarbasi emas) kiritilgan 100-golini nishonladi. AlbicelesteTalk nashriga ko‘ra, bu ko‘rsatkichga ilgari hech bir futbolchi erishmagan.
Ma’lumot uchun, Messi joriy mavsum MLS doirasidagi 15 ta bahsda maydonga tushib, 14 ta gol va 6 ta assist muallifiga aylangan. Bu ko‘rsatkich unga to‘purarlar ro‘yxatida ikkinchi o‘rinni taqdim etmoqda. Hozirda peshqadam — “Neshvill” hujumchisi Sem Sarrij (16 gol).
Eslatib o‘tamiz, Lionel Messi 2023-yil yozida “Inter Mayami” klubiga qo‘shilgan.
Izoh (0)