Arzon narxdagi “dacha”ga oldindan to‘lov qilmang — Ichki ishlar bosh boshqarmasi

Toshkent viloyati Ichki ishlar bosh boshqarmasining ogohlantirishicha, mehmon uylariga internet orqali to‘lov qilishda shoshilmaslik kerak.

Chunki firibgarlar bu yo‘nalishga ham allaqachon kirib olishgan. Bugun internet orqali, ayniqsa, Bo‘stonliq tumanining tog‘li hududlaridagi dachalarni band qilish uchun “Oldindan to‘lov qiling” mazmunidagi ko‘plab eʼlonlar joylashtirilmoqda. Ular orasida firibgarlar ham sizning eʼtiboringizni tortuvchi, ishonarli eʼlonlarni joylashtirishadi.

Suratlar, videolar haqiqiy eʼlonlardan olingan bo‘ladi. Farq shundaki, firibgarlar sizga katta va hashamatli mehmon uylarini juda arzon narxlarda taklif qilishadi. Mijozlari ko‘pligini va zudlik bilan oldindan to‘lov qilishingiz kerakligini taʼkidlashadi, deyiladi boshqarma eʼlonida.

Boshqarma matbuot xizmatining alohida urg‘ulashicha, Siz pullarni o‘tkazishingiz bilan ushbu dacha haqidagi eʼlon va siz bilan yozishgan akkaunt o‘chirib tashlanadi.

Bularga aldanmaslik uchun faqatgina rasmiy saytlardan foydalaning. Arzon narxdagi hashamatli uylarga hech qachon oldindan to‘lov qilmang, deyiladi unda.

Avvalroq Raqobatni rivojlantirish va iste‘molchilar huquqlarini himoya qilish qo‘mitasi xorijda ishlash va o‘qish uchun “oson” borishni va‘da qilayotgan konsalting firmalardan ogoh bo‘lishga chaqirgan. Migratsiya agentligi esa O‘zbekiston fuqarolarini xorijdan qaytarishda firibgarlik kuzatilayotgani va xorijda vafot etgan o‘zbekistonliklar jasadini olib kelish uchun soxta pul yig‘ish aksiyalari o‘tkazilayotganidan ogohlantirgan.

Javobgarlik

Firibgarlik - aldash yoki ishonchni suiiste‘mol qilish yo‘li bilan o‘zganing mulkini yoki o‘zganing mulkiga bo‘lgan huquqni qo‘lga kiritish uchun jinoiy javobgarlik mavjud.

Firibgarlik:

• ancha miqdorda;
• bir guruh shaxslar tomonidan oldindan til biriktirib;
• kompyuter texnikasi vositalaridan foydalanib sodir etilgan bo‘lsa, jazolanadi.

Quyidagi hollarda sodir etilgan firibgarlik:

• ko‘p miqdorda;
• takroran yoki xavfli retsidivist tomonidan;
• xizmat mavqeyidan foydalanib sodir etilgan bo‘lsa - jazolanadi.

Firibgarlik 8-yildan 10-yilgacha ozodlikdan mahrum qilish bilan jazolanishi mumkin:

• juda ko‘p miqdorda;
• o‘ta xavfli retsidivist tomonidan;
• uyushgan guruh tomonidan yoki uning manfaatlarini ko‘zlab sodir etilgan bo‘lsa, jazolanadi.

Yetkazilgan moddiy zararning o‘rni qoplangan taqdirda ozodlikni cheklash va ozodlikdan mahrum qilish tariqasidagi jazo qo‘llanilmaydi.