Dima Bilan YouTubeʼdagi Nadejda Streles kanaliga bergan intervyusida unga onkologiyadan oldingi holat tashxisi qo‘yilgani va 2022-yil fevral oyida jiddiy jarrohlik amaliyotini boshidan o‘tkazganini maʼlum qildi.
“Men xastaligimda hayotning maʼnosini shunchalik chuqur izlashni boshladimki, baʼzi muolajalarni og‘riq qoldiruvchi vositalarsiz qildim, bunday kasallik nima ekanini, qandayligini tushunish va baʼzi narsalarni yaxshiroq anglash uchun”, deb eslaydi 43 yoshli xonanda.
Uning so‘zlariga ko‘ra, o‘z vaqtida samarali davolanish tufayli hozirda uning ahvoli yaxshi va u sog‘lom.
Dima sezilarli darajada vazn yo‘qotganidan beri tarqalgan mish-mishlarni ham rad etdi. O‘shanda tarmoqlarda uni bedavo dardga chalingan deb taxmin qilishgan, hattoki uni saraton va OIV bilan kasallangani haqida yozishgan edi.
“Birinchidan, menda hech qanday OIV yo‘q. Men mutlaqo sog‘lom odamman. Faqat bir narsa, chap oyog‘im singandan keyin, uning tomirlar sistemasi biroz ishdan chiqdi. Qolgan hamma narsa yaxshi”, dedi Dima Bilan.
Shuningdek, xonanda shifokorlarga minnatdorlik bildirdi: “Men tibbiyotimizni yaxshi ko‘raman, barcha ijtimoiy tarmoqlarda ularga shunchaki sheʼrlar yozdim, chunki ular shunday fidoyi insonlardir.”
Izoh (0)