Toshkentdan Issiqko‘lga mavsumiy avtobus qatnovlari boshlanadi, deb xabar bermoqda Transport vazirligi.
Unga ko‘ra, joriy yilning 11-iyun sanasidan boshlab Toshkent–Cho‘lpon-ota (Issiqko‘l) yo‘nalishida mavsumiy avtobus qatnovi boshlanadi. Qatnovlar har kuni Yutong avtobuslarida amalga oshiriladi. Avtobus soat 15:00 da Toshkent avtovokzalidan jo‘naydi.
Chipta narxi 300 000 so‘m etib belgilangan.
Toshkentdan Issiqko‘lga 2025-yilning yozidan poyezd qatnovi yo‘lga qo‘yilishi aytilgan edi.
Issiqko‘ldagi to‘rtta pansionat O‘zbekistonga berilgani ma’lum qilingandi. Shavkat Mirziyoyev Qirg‘iziston hukumati bilan Issiqko‘ldagi kurort va dam olish maskanlari to‘g‘risidagi kelishuvni tasdiqlagandi. Bitim Sadir Japarovning iyul oyidagi O‘zbekistonga tashrifi doirasida imzolangan. Qirg‘iziston Vazirlar Mahkamasi ushbu kelishuvni 23-sentyabrda tasdiqlagan.
Issiqko‘l — Qirg‘izistonning “marvaridi"
Issiqko‘l (qirg‘iz tilida “Issyk-Kul” — “iliq ko‘l”) — Qirg‘izistonning shimoli-sharqida, Tyan-Shan tog‘ tizmasida joylashgan yirik tog‘ ko‘li bo‘lib, dunyodagi eng chuqur va eng katta sho‘r suvli ko‘llardan biridir. Ko‘lning uzunligi 178 km, eni 60 km, chuqurligi esa 668 metrga yetadi. U dengiz sathidan 1 607 metr balandlikda joylashgan bo‘lib, yuqori sho‘rligi tufayli qishda muzlamaydi.
Turizm statistikasi
Issiqko‘l Qirg‘izistonning eng mashhur turistik yo‘nalishlaridan biri hisoblanadi. 2024-yil yozgi mavsumida bu hududga 724 722 nafar sayyoh tashrif buyurgan bo‘lib, bu o‘tgan yilga nisbatan 29 ming kishiga ko‘pdir.
Umuman olganda, Qirg‘izistonga tashrif buyurayotgan xorijiy sayyohlarning asosiy qismini O‘zbekiston fuqarolari tashkil etadi. 2024-yilda mamlakatga kelgan 8,6 million sayyohning 61,7 foizi O‘zbekistondan bo‘lgan.
O‘zbekiston bilan aloqalar
O‘zbekiston va Qirg‘iziston o‘rtasida turizm sohasidagi hamkorlik yildan-yilga mustahkamlanmoqda. 2023-yil 4-iyul kuni O‘zbekiston delegatsiyasi Issiqko‘l viloyatiga tashrif buyurib, Toshkentdan Issiqko‘lga birinchi mavsumiy charter reysining ochilishida ishtirok etdi.
Bundan tashqari, Issiqko‘l O‘zbekistonning turistik yo‘nalishlariga ham kiritilgan bo‘lib, ko‘plab sayyohlik agentliklari Toshkent, Samarqand, Buxoro kabi shaharlarni Issiqko‘l bilan birlashtirgan turlarni taklif etmoqda.
Izoh (0)