O‘zbekiston Respublikasi Oliy Majlisi Senati Raisi Tanzila Norboyeva boshchiligidagi O‘zbekiston parlament delegatsiyasi Sankt-Peterburg shahrida Mustaqil Davlatlar Hamdo‘stligiga aʼzo davlatlar Parlamentlararo Assambleyasining bahorgi sessiyasi tadbirlarida ishtirok etdi.
Parlamentlararo Assambleya Kengashi majlisining kun tartibidagi masalalar muhokamasiga o‘tishdan avval Mustaqil Davlatlar Hamdo‘stligiga aʼzo davlatlar Parlamentlararo Assambleyasi Kengashi raisi, Rossiya Federatsiyasi Federal Majlisi Federal Kengashi Raisi V.Matviyenko Parlamentlararo ittifoqning Toshkent shahrida o‘tkazilgan 150-yubiley assambleyasi va uning natijalariga to‘xtalib, mazkur anjumanning yuqori saviyada tashkil etilgani, qabul qiluvchi tomonning mehmonlarni qabul qilish va tadbir o‘tkazishdagi yuksak mahorati hamda masʼuliyatini alohida eʼtirof etdi hamda Tanzila Norboyeva va uning jamoasini ushbu nufuzli tadbirni yuksak darajada o‘tkazgani bilan tabrikladi.
O‘z navbatida, Oliy Majlis Senati Raisi T. Norboyeva mazkur Assambleya MDH davlatlari parlament delegatsiyalarining faol ishtiroki, ularning qabul qilingan hujjatlarga qo‘shgan hissasi hamda ilgari surgan takliflari muhim ahamiyatga ega ekanini taʼkidladi. Shuningdek, kelgusida ham bunday yirik xalqaro anjumanlarni o‘tkazishda hamkorlik qilishga doimo tayyor ekanini alohida taʼkidladi.
Shundan so‘ng kun tartibidagi masalalar ko‘rib chiqildi.
Ishtirokchilar MDH PA xalqaro kuzatuvchilarining Belarus Respublikasi Prezidenti saylovi va Tojikiston parlament saylovi monitoringi natijalariga eʼtibor qaratdilar.
Xususan, MDH PA missiyasi koordinatori, Oliy Majlis Senati Sud-huquq masalalari va korrupsiyaga qarshi kurashish qo‘mitasi raisi A.Eshmuratovning 2025-yil 2-mart kuni Tojikiston parlamentiga bo‘lib o‘tgan saylovni kuzatish natijalari to‘g‘risida maʼlumot berib o‘tdi.
Shuningdek, Kengash majlisida MDH Parlamentlararo Assambleyasining 2024-yildagi faoliyati sarhisob qilinib, kelgusida o‘tkazilishi rejalashtirilayotgan xalqaro sammitlarga tayyorgarlik masalalari muhokama qilindi.
Tadbir doirasida Tanzila Norboyeva Ozarbayjon Respublikasi Milliy Mejlisi Raisi Sahiba Gafarova bilan uchrashuv o‘tkazdi.
Tomonlar O‘zbekiston-Ozarbayjon munosabatlarining jadal rivojlanishi ikki davlat rahbarlarining mustahkam do‘stligi va o‘zaro ishonchiga asoslanganini taʼkidladi. Birinchi O‘zbekiston-Ozarbayjon parlament ayol aʼzolari forumiga tayyorgarlik ishlari ham diqqat markazida bo‘ldi. Mazkur forumni tashkil etish bo‘yicha do‘stlik guruhi tuzishga kelishib olindi. O‘zbekiston tomonidan Forum konsepsiyasi hamda gender tenglik, taʼlim, ayollar tadbirkorligi, turizm va yoshlar parlamentlari hamkorligini qamrab olgan panel sessiyalar mavzulari taklif etildi.
Shuningdek, Tanzila Norboyeva Tojikiston Respublikasi Majlisi milli Majlisi Oli Raisi Rustami Emomali bilan uchrashuv o‘tkazdi.
Suhbat davomida ikki tomonlama hamkorlikning dolzarb masalalari muhokama qilinib, O‘zbekiston-Tojikiston strategik sherikligining mustahkam asosi ikki davlat rahbarlarining yaqin hamkorligi va o‘zaro ishonchning yuqori darajasi asosida shakllanayotgani taʼkidlandi.
Parlamentlarning yangi tarkibi shakllangani munosabati bilan parlamentlararo hamkorlikni faollashtirish rejalari muhokama qilindi. Tomonlar oliy darajada erishilgan kelishuvlar ijrosi ustidan parlament nazorati masalalarini kun tartibiga kiritgan holda “O‘zbekiston – Tojikiston” do‘stlik guruhi yig‘ilishini o‘tkazishga tayyorligini tasdiqladi.
Tanzila Norboyeva Sankt-Peterburg shahrida Belarus Respublikasi Milliy Majlisi Respublika Kengashi Raisi Natalya Kochanova bilan uchrashuv o‘tkazdi.
Uchrashuv chog‘ida parlamentlararo hamkorlikning bugungi holati va istiqbollari, shuningdek, O‘zbekiston parlament delegatsiyasining joriy yil avgust oyida Belarusning Vitebsk viloyatiga bo‘lajak rasmiy tashrifiga tayyorgarlik masalalari muhokama qilindi.
Oliy Majlis Senati Raisi Tanzila Norboyeva boshchiligidagi O‘zbekiston parlamenti delegatsiyasi Piskarev memorial qabristoniga gulchambarlar qo‘yish marosimida ishtirok etdi.
Marosim Ikkinchi jahon urushidagi G‘alabaning 80 yilligiga bag‘ishlangan bo‘lib, tinchlik va ozodlik yo‘lida jonini fido qilgan millionlab insonlarning jasoratiga chuqur minnatdorlik va hurmat ifodasi bo‘ldi.
2025-yil 18-aprel kuni O‘zbekiston Respublikasi Oliy Majlisi Senati Raisi Tanzila Norboyeva boshchiligidagi parlament delegatsiyasi Sankt-Peterburg shahrida MDH PAning 1941–1945 yillardagi Ikkinchi jahon urushidagi G‘alabaning 80 yilligiga bag‘ishlangan tantanali majlisida ishtirok etdi.
Tadbirda MDH ishtirokchi davlatlari parlamentlari va xalqaro tashkilotlar rahbarlari ham qatnashdi.
Tantanali majlisda Oliy Majlis Senati Raisi Tanzila Norboyeva so‘zga chiqdi.
O‘zbekiston parlamenti yuqori palatasi rahbari tadbir ishtirokchilarini Buyuk G‘alabaning 80 yilligi bilan samimiy muborakbod etib, ushbu sana butun insoniyat uchun ulug‘ qadriyatlar — tinchlik, matonat va hamjihatlik timsoli ekanini taʼkidladi.
Buyuk G‘alaba — fashizmga qarshi yelkama-yelka kurashgan barcha xalqlarning umumiy zafaridir. Urush yillarida O‘zbekiston xalqining frontda ham, front ortida ham ko‘rsatgan beqiyos jasorati va mehnati alohida eʼtirof etildi.
1941–1945-yillar mobaynida mamlakatimizdan qariyb 2 million kishi safarbar qilingani, ularning yarmidan ko‘pi janglarda halok bo‘lgani, yaralangani yoki bedarak yo‘qolgani taʼkidlandi. Shu bilan birga, O‘zbekiston 1,5 milliondan ortiq evakuatsiya qilingan kishilarni — keksalar, ayollar va bolalarni, shu jumladan 250 ming yetim bolani qabul qilgani, ularga boshpana va g‘amxo‘rlik ko‘rsatgani alohida qayd etildi.
G‘alabaga olib borgan yo‘l faqat qurol bilan emas, balki front ortidagi mehnat, bag‘rikenglik va hamjihatlik tuyg‘ulari bilan ham taʼminlangan. O‘sha yillarda O‘zbekistonga 170 dan ziyod zavod va fabrikalar evakuatsiya qilinib, qisqa muddatda harbiy mahsulotlar ishlab chiqarishga o‘tkazilgan.
Bunday tarixiy sana xalqlarimiz o‘rtasidagi do‘stlik va hamkorlik rishtalarini yana-da mustahkamlashga, yosh avlod uchun tinchlik va bag‘rikenglik sabog‘i sifatida xizmat qilishi lozimligi taʼkidlab o‘tildi.
Izoh (0)