Hozirda Xitoy bozorida taklif etilayotgan yengil avtomobillarning aksariyati haydovchini boshqaruv jarayonidan uzoq vaqt chalg‘itishga yo‘l qo‘ymaydigan ikkinchi darajali avtopilot bilan jihozlangan. GAC Aion va Didi tashkil etgan qo‘shma korxona joriy yil oxirigacha to‘rtinchi darajali avtonomlik bilan ishlaydigan haydovchisiz taksilar ishlab chiqarishni yo‘lga qo‘yishni rejalashtirmoqda. Bu haqda CarNewsChina xabar bermoqda.
SAE tasnifiga ko‘ra, bu inson foydalanishi mumkin bo‘lgan an’anaviy boshqaruv moslamalarining mavjudligini anglatadi, biroq avtomatikaning ko‘p hollarda haydovchi aralashuvisiz ishlash qobiliyatini nazarda tutadi.
Ta’kidlanishicha, bir hafta oldin GAC Aion va DiDi Autonomous Driving o‘zlarining Guangzhou Andi Technology qo‘shma korxonasi litsenziya olganini e’lon qildi. Mazkur korxona joriy yil oxirigacha to‘rtinchi darajali avtonomlikka ega haydovchisiz taksilarni ommaviy ishlab chiqarishni yo‘lga qo‘yishni mo‘ljallamoqda. Ushbu transport vositasini ishlab chiqish allaqachon yakuniy bosqichda. Bu Xitoyda ushbu sinfdagi avtopilotga ega birinchi avtomobil bo‘ladi.
Ishlab chiquvchilar kuzovning mashhur va ko‘p qirrali turi – krossoverni tanladilar. Transport xizmatlarini ko‘rsatishga yo‘naltirilganlik orqa o‘rindiqda yo‘lovchilar uchun keng joy nazarda tutilgan salon joylashuvida o‘z aksini topadi.
Ushbu hamkorlikda GAC Aion apparat bazasi va ommaviy ishlab chiqarish uchun mas’ul, DiDi esa dasturiy ta’minotni ishlab chiqish va boshqaruv elektronikasining bir qismi bilan shug‘ullanadi. Shuningdek, DiDi haydovchisiz taksilar parkini boshqarish imkonini beruvchi axborot infratuzilmasini ta’minlash uchun ham javobgar bo‘ladi.
Hozirgi DiDi apparat platformasi kameralar, lidar va turli diapazondagi radarlar, shuningdek mikrofonlarni o‘z ichiga olgan jami 33 ta sensordan foydalanishni nazarda tutadi. Bunday kombinatsiya har qanday ob-havo sharoitida transport vositasi atrofidagi vaziyatni yuzlab metr masofada nazorat qilish imkonini beradi. DiDi haydovchisiz taksilarni o‘zining operatsion tizimi bilan jihozlaydi.
E’tiborli jihati shundaki, GAC joriy yilning to‘rtinchi choragiga qadar Xitoy bozoriga avtonomlikning uchinchi darajasiga ega yengil avtomobillarni alohida olib chiqishni rejalashtirmoqda. Kelgusi yilda modellar assortimenti kengaytiriladi. GAC rahbariyati Xitoy xoldingi oldiga 2027-yil yakuniga ko‘ra avtopilot sohasida jahon yetakchilari qatoriga kirish vazifasini qo‘ymoqda. Boshqa haydovchisiz taksi ishlab chiqaruvchilari orasida GAC allaqachon Xitoyning beshta yirik shahri ko‘chalarida 40 million kilometrdan ortiq masofada to‘plangan ma’lumotlarga ega bo‘lgan Pony.ai kompaniyasi bilan hamkorlik qilmoqda.
Izoh (0)