Afg‘onistonning Hirot shahrida avtobus ishtirokida yuz bergan yirik yo‘l-transport hodisasida 73 kishi, jumladan, 17 nafar bola halok bo‘ldi. Bu haqda BBC xabar berdi.
Ma’lum qilinishicha, Kobulga yo‘l olgan avtobus yuk mashinasi (“Mazda”) va mototsikl bilan to‘qnashib, yonib ketgan. Avtobusdagi barcha yo‘lovchilar, shuningdek, boshqa transport vositalaridagi 4 kishi ham halok bo‘lgan. Shahar hokimligi vakili Muhammad Yusuf Saidiy barcha yo‘lovchilar Eron tomonidan deportatsiya qilinganlar ekanini tasdiqlagan. Hodisa avtobus haydovchisining ehtiyotsizligi va haddan ortiq tez haydagani oqibatida sodir bo‘lgani aytilmoqda.
Eron oldinroq hujjatsiz afg‘onlarning ixtiyoriy ravishda mamlakatni tark etishi uchun iyul oyiga qadar muddat bergan edi. Ammo iyun oyida Isroil bilan qisqa muddatli urushdan so‘ng, mamlakat rasmiylari milliy xavfsizlik muammolarini iddao qilib, yuz minglab afg‘onlarni majburan vataniga qaytargan.
BMT Qochqinlar agentligi ma’lumotlariga ko‘ra, yanvar oyidan beri 1,5 milliondan ortiq afg‘onistonlik Eronni tark etishga majbur bo‘lgan. Ekspertlar fikricha, Afg‘oniston majburan qaytarilgan bu qadar ko‘p fuqaroni qabul qilishga tayyor emas. Mamlakat hozirda Pokistondan qaytayotgan yuz minglab muhojirlar oqimi bilan ham kurashmoqda.
Izoh (0)