Toshkentda fuqarolarni chuv tushirgan avtosalon masʼullariga jinoyat ishi ochildi. Bu haqda Bosh prokuratura matbuot xizmati rahbari xabar berdi.
Qayd etilishicha, jamiyat mansabdor shaxslari 19 nafar fuqaroga avtomashina olib kelib berish haqida yolg‘on vaʼdalar berib, 6 milliard 169 million so‘m to‘lov pulini o‘zlarining ehtiyojlari uchun sarflab yuborgani aniqlangan.
Holat bo‘yicha Jinoyat kodeksining 168- (firibgarlik) va boshqa moddalari bilan jinoyat ishi qo‘zg‘atilgan.
Toshkent shahridagi Allianse Motors MCHJ mijozlar bilan shartnoma tuzib, mashinalarni vaqtida keltirib bermagan. Ayrimlarni esa yetkazib berilgan avtoransport vositasining hujjatini to‘g‘rilab bermasdan ovora qilgan.
Mart oyi oxirlarida Toshkentda avtomashinalarni uch oy muddat ichida avtosalondan yetkazib berishni aytib, fuqarolardan 6,1 milliard so‘mni aldab olgan shaxslar qamalgani to‘g‘risida xabar berilgandi. Yanvar oyida bo‘lsa Toshkentdagi My cars avtomarkazi odamlarni aldab ketgani haqida xabarlar tarqalgan va holat bo‘yicha jinoyat ishi qo‘zg‘atilgan edi.
Izoh (0)