Prezident raisligida bo‘lib o‘tayotgan yig‘ilishda bir yil davomida yana 50 ming gektar yerni 100 mingta kambag‘al oilaga bo‘lib berish rejalashtirilgani maʼlum qilindi. Bu haqda Prezident matbuot xizmati xabar berdi.
![](/static/2024/09/11/14-Yx5xisEL.jpg)
Maʼlum qilinishicha, ushbu yerlarda “kompaniya – kooperativ – dehqon xo‘jaligi” tamoyili asosida dehqonchilik va bog‘dorchilik tashkil etiladi. Bunda, yerdan uch xil daromad olinadigan yangi tizim yaratiladi:
- qishloq xo‘jaligi mahsuloti yetishtiruvchi va eksport qiluvchi katta kompaniya kambag‘al oilalardan yerni ikkilamchi ijaraga oladi;
- yoki yer egalari ulushdor sifatida kooperatsiyaga birlashib, kompaniyalardan buyurtma oladi va topilgan daromad ular o‘rtasida taqsimlanadi;
- har ikki holatda ham ushbu aholi yerda o‘zi mahsulot yetishtirib, buning uchun oylik oladi.
Yaʼni, kambag‘al oila o‘ziga berilgan yerdan yanada samarali foydalanib, oylik olish bilan birga, ijara yoki dividenddan daromad ko‘radi. Mutasaddilarga viloyat hokimlari bilan birgalikda bu orqali kamida 200 ming aholini band qilish topshirildi.
Yaqinda mikromoliya xizmatlari bo‘yicha yangi mexanizmlarni joriy qilindi. Endilikda 2024-2025-yillarda odamlar o‘zini o‘zi band qilishi, kichik va o‘rta tadbirkorlik bilan shug‘ullanishi uchun mikrokreditlar ajratishga 10 trillion so‘m beriladi.
Shuningdek, kambag‘al oilalarga 30 million so‘mgacha uskuna, ko‘chma do‘kon (fud-trak), motoroller, skuter kabi vositalar 5 yilda bo‘lib to‘lash sharti bilan beriladi. Kambag‘al oila farzandlariga kompyuter sotib olish uchun 5 yilga 2 yillik imtiyozli davr bilan foizsiz kredit ajratiladi.
“Zarbdor tajribasi” asosida sanoat, qishloq xo‘jaligi va xizmatlar sohasida kamida 5 tadan “drayver” loyihani infratuzilma bilan taʼminlash uchun yil yakunigacha 500 milliard so‘m, kelasi yili yana 1 trillion so‘m ajratiladi. Hokimlarga bu loyihalarni tezlashtirib, yil oxirigacha 150 ming aholini ishli qilish topshirildi.
Hozirda xususiy inson resurslari kompaniyalari ish beruvchilarga bilim va ko‘nikmasi, salohiyati bor kadrlarni topib bermoqda. Endilikda bu tajribani kengaytirish zarurligi qayd etildi. Savdo-sanoat palatasi huzurida ishlash istagi bor kambag‘al aholi orasidan tadbirkorlarga ishchi topib, ularni tayyorlab beradigan markaz tashkil qilinadi.
Ushbu markaz orqali qaysi yo‘nalishda qancha ishchi kerakligi o‘rganiladi, kambag‘al aholi nimaga qiziqishi va ko‘nikmasi borligi aniqlanadi, tadbirkorlar talabiga mos kambag‘al oila aʼzolari ishga yo‘naltiriladi, malakasi yetmaganlar esa tadbirkorlar bilan birga kasbga o‘qitilib, keyin ishli qilinadi.
Umuman, aytilgan barcha imkoniyatlar hisobiga yil yakunigacha 500 ming, bir yilda 1,2 million aholini kambag‘allikdan chiqarish masʼul vazirlik va idoralar rahbarlari, viloyat hokimlari oldiga vazifa qilib qo‘yildi.
Izoh (0)