Qoraqalpog‘iston Respublikasining Qo‘ng‘irot, Farg‘ona viloyatining Uchko‘prik hamda Qashqadaryo viloyatining Qamashi tumanida qo‘lbola alkogol mahsulotlari ishlab chiqarayotgan yashirin sexlar faoliyatiga chek qo‘yildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Uchko‘prik tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda, fuqaro J.M. O‘zbekiston tumanidagi xonadonda yashirin sex tashkil qilib, qalbaki aksiz marka va yorliqlardan foydalangan holda qo‘lbola alkogol mahsulotlari ishlab chiqarayotganligi aniqlanib, ushbu yashirin sexdan turli nomdagi 2 790 dona isteʼmolga yaroqsiz alkogol mahsuloti, 1 692 dona qalbaki aksiz marka, 5 781 dona QR-kod markirovka, 1 091 dona shisha idish, 60 litr spirt va boshqa ishlab chiqarishda foydalanilgan buyumlar ashyoviy dalil sifatida olingan.
Shu kabi, departamentning Qo‘ng‘irot tuman bo‘limi tomonidan o‘tkazilgan tezkor tadbirda alkogol mahsulotlarini yashirin ishlab chiqarish bilan shug‘ullanib kelgan fuqaro T.N. qo‘lbola usulda tayyorlangan 514 dona “Qaratau” nomli qalbaki aksiz markali alkogol mahsulotlarini o‘tkazish maqsadida tanishi B.U.ning xonadonida vaqtincha saqlab qo‘yganligi aniqlanib, ushbu mahsulotlar ashyoviy dalil sifatida olingan.
Departamentning Qamashi tuman bo‘limi va IIB xodimlari hamkorligida o‘tkazilgan tezkor tadbirda fuqaro Y.S. ning boshqaruvidagi Damas avtomashinasi salonida sotish maqsadida olib ketilayotgan 1 200 dona isteʼmolga yaroqsiz qalbaki aksiz markali alkogol mahsulotlari borligi aniqlanib, ashyoviy dalil sifatida olingan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)