FIFA prezidenti Janni Infantino Sayfiddin Ermatov vafoti munosabati bilan hamdardlik bildirdi.
![](/static/2024/08/25/photo_2024-08-14_16-42-33-lwH7JbiN-q9x-7HDQ.jpg)
“Sobiq futbolchi va murabbiy Sayfiddin Ermatov hayotdan ko‘z yumgani munosabati bilan chuqur va samimiy hamdardligimni izhor qilaman. Bu boradagi tuyg‘ularimizni bildirish uchun so‘z ojiz.
Sayfiddin Ermatov futbolchilik davrida “Paxtakor”, “Spartak”, “Avtomobilchi” kabi klublar sharafini himoya qilgan. Shundan so‘ng murabbiylik faoliyatini boshlab, O‘zbekiston yoshlar terma jamoasini boshqardi. Shuningdek, nazoratchi-hakam sifatida ishlagan. Futboldagi yuksak natijalar egasi, “O‘zbekiston sport faxriysi” unvoni sohibi tomonidan qoldirilgan meros, qolaversa uning insoniy hamda yetakchilik xususiyatlari hech qachon unutilmaydi.
Xalqaro futbol jamoatchiligi nomidan O‘zbekiston futbol assotsiatsiyasiga, Sayfiddin Ermatovning oila aʼzolari va barcha yaqinlariga chuqur taʼziyamizni bildiramiz. Bizning bu inson haqidagi xotiralarimiz va ushbu samimiy so‘zlarimiz og‘ir yo‘qotish davrida taskin bo‘lishiga umid qilamiz”, — deyiladi FIFA rahbarining O‘FA prezidenti Abdusalom Azizovga yo‘llagan xatida.
O‘FA birinchi vitse-prezidenti Ravshan Ermatovning otasi Sayfiddin Ermatov 14-avgust kuni 71 yoshida vafot etgandi.
Ma’lumot uchun, Sayfiddin Ermatov faoliyati davomida ko‘plab isteʼdodli yosh hakamlarni tarbiyalashda katta hissa qo‘shgan. Shogirdlari orasida FIFA referisi, futbol mundiallarini boshqarish bo‘yicha jahonning mutlaq rekordchisi Ravshan Ermatov, shuningdek, Abduhamidullo Rasulov kabi taniqli hakamlarni uchratish mumkin. Shuningdek, tarkibida Server Jeparov, Shuhrat Mirxoldirshoyev, Yaroslav Krushelniskiy, Yuriy Nikitov kabi iqtidorlarni jamlagan 1982-yilda tug‘ilgan futbolchilardan iborat O‘zbekiston o‘smirlar terma jamoasi bosh murabbiyi bo‘lgan.
Izoh (0)