FIFA президенти Жанни Инфантино Сайфиддин Эрматов вафоти муносабати билан ҳамдардлик билдирди.
“Собиқ футболчи ва мураббий Сайфиддин Эрматов ҳаётдан кўз юмгани муносабати билан чуқур ва самимий ҳамдардлигимни изҳор қиламан. Бу борадаги туйғуларимизни билдириш учун сўз ожиз.
Сайфиддин Эрматов футболчилик даврида “Пахтакор”, “Спартак”, “Автомобильчи” каби клублар шарафини ҳимоя қилган. Шундан сўнг мураббийлик фаолиятини бошлаб, Ўзбекистон ёшлар терма жамоасини бошқарди. Шунингдек, назоратчи-ҳакам сифатида ишлаган. Футболдаги юксак натижалар эгаси, “Ўзбекистон спорт фахрийси” унвони соҳиби томонидан қолдирилган мерос, қолаверса унинг инсоний ҳамда етакчилик хусусиятлари ҳеч қачон унутилмайди.
Халқаро футбол жамоатчилиги номидан Ўзбекистон футбол ассоциациясига, Сайфиддин Эрматовнинг оила аъзолари ва барча яқинларига чуқур таъзиямизни билдирамиз. Бизнинг бу инсон ҳақидаги хотираларимиз ва ушбу самимий сўзларимиз оғир йўқотиш даврида таскин бўлишига умид қиламиз”, — дейилади FIFA раҳбарининг ЎФА президенти Абдусалом Азизовга йўллаган хатида.
ЎФА биринчи вице-президенти Равшан Эрматовнинг отаси Сайфиддин Эрматов 14 август куни 71 ёшида вафот этганди.
Маълумот учун, Сайфиддин Эрматов фаолияти давомида кўплаб истеъдодли ёш ҳакамларни тарбиялашда катта ҳисса қўшган. Шогирдлари орасида FIFA рефериси, футбол мундиалларини бошқариш бўйича жаҳоннинг мутлақ рекордчиси Равшан Эрматов, шунингдек, Абдуҳамидулло Расулов каби таниқли ҳакамларни учратиш мумкин. Шунингдек, таркибида Сервер Жепаров, Шуҳрат Мирхолдиршоев, Ярослав Крушелниский, Юрий Никитов каби иқтидорларни жамлаган 1982 йилда туғилган футболчилардан иборат Ўзбекистон ўсмирлар терма жамоаси бош мураббийи бўлган.
Изоҳ (0)