2024 йил 21 август куни Ўзбекистон Олий Мажлис Сенати ва Миср араб республикаси Сенати ўртасидаги ҳамкорликни мустаҳкамлаш мақсадида парламентлараро дўстлик гуруҳларининг биринчи видео мулоқоти бўлиб ўтди.
Учрашув кун тартибидан Ўзбекистон—Миср муносабатларини савдо-иқтисодий, маданий-гуманитар соҳаларда ҳамда парламентлараро йўналишларида янада ривожлантириш ва ҳамкорлик кўламини кенгайтириш масалалари ўрин олди.
Ўзбекистон ва Миср ўртасида стратегик шерикликка асосланган муносабатлар икки мамлакат президентларининг ташрифлари ва мунтазам мулоқотлари натижасида мазмун ва сифат жиҳатидан янги босқичга кўтарилиб бораётгани алоҳида қайд этилди.
Учрашувда томонлар умумий тарихий, маданий қадриятлар ҳамда урф-одатларнинг ўхшашлиги икки мамлакатнинг озаро алоқаларининг асосий омили бўлиб хизмат қилаётганини таъкидлади. Маданий-гуманитар алоқаларни илм-фан, таълим, нодир қўл ёзмаларни илмий ўрганиш, тиббиёт, туризм, меҳмонхона хизматлари йўналишларида ўзаро манфаатли лойиҳаларни амалга ошириш зарурлиги муҳокама қилинди.
Миср томони мамлакатимизда жорий йилда бўлиб ўтадиган муҳим сиёсий тадбир – парламент сайловида муваффақиятлар тилаб, унда халқаро кузатувчилар сифатида қатнашишга тайёрлигини билдирди.
Мулоқот давомида икки давлат раҳбарлари ўртасида эришилган олий даражадаги келишувларнинг ижросини таъминлаш мақсадида тизимли парламент назоратини ўрнатиш борасида келишувга эришилди.
Суҳбат якунида навбатдаги парламентлараро дўстлик гуруҳи йиғилишини Тошкент ёки Қоҳирада ташкил этиш, жумладан, тадбирнинг санаси ва кун тартиби масалаларини дипломатик каналлар орқали мувофиқлаштиришга келишиб олинди.
Изоҳ (0)