Checheniston rahbari Ramzan Qodirov milliarder Ilon Maskdan Cybertruck elektro-pikapini olgani va u urush zonasidagi jangchilarga yuborilishini aytdi. Bu haqda u o‘zining Telegram kanalida xabar berdi.
Ramzan Qodirov Cybertruck’ga pulemyot o‘rnatgan holda uni shaxsan sinovdan o‘tkazgan.
“Men yangi texnikani mamnuniyat bilan sinab ko‘rdim va uni ‘Kiber yirtqich’ deb atashlari bejiz emasligiga ishonch hosil qildim. Haqiqatan yengilmas va chaqqon hayvon. Manyovrli avtomobil, tezlikka erishadi va to‘siqlarni osonlik bilan yengib o‘tadi. Juda qulay mashina ekan. Shunday ajoyib xususiyatlarga ega bo‘lgani uchun, kibertrak yaqin orada maxsus harbiy operatsiya zonasiga jo‘natiladi va u yerda tegishli sharoitlarda foydalaniladi. Ishonchim komilki, bu ‘yirtqich’ jangchilarimizga katta foyda keltiradi.
Ilon Maskka samimiy minnatdorlik bildiraman! Bu, albatta, zamonamizning eng kuchli dahosi va mutaxassisi. Buyuk inson! Kibertrak esa katta loyiha bo‘lib chiqdi. Shubhasiz, dunyodagi eng yaxshi avtomobillardan biri! Men bu mashinani tom ma’noda sevib qoldim”, deydi Qodirov.
Shuningdek, Checheniston rahbari Ilon Maskka minnatdorlik bildirib, uni Grozniyga taklif qildi.
“Grozniyga keling, sizni eng qadrli mehmonimday kutib olaman! Rossiya Tashqi ishlar vazirligidagilar bunday tashrifga qarshi bo‘lmaslar deb o‘ylayman. Va, albatta, ‘maxsus harbiy operatsiya’ni yakunlashga ko‘maklashadigan yangi ishlanmalaringizni intizorlik bilan kutib qolamiz”, deydi u.
Izoh (0)