Rossiya prezidenti matbuot kotibi Dmitriy Peskovning aytishicha, Kreml Gruziyaning boshqa davlatlar mamlakat ishlariga aralashishini istamayotganini ko‘rib turibdi. Uning qo‘shimcha qilishicha, Gruziya parlamentida xorijiy agentlar to‘g‘risidagi qonunning qabul qilinishi va buning fonida ommaviy norozilik namoyishlari mamlakatning ichki ishlari bo‘lib, unga Rossiya aralashish niyatida emas.
“Biz Gruziyaning ichki ishlariga tashqaridan yashirin aralashuvni yana bir bor ko‘ryapmiz. Hatto u yoki bu qonunni qabul qilsalar, Gruziyaga qarshi sanksiyalar qo‘llash tahdidlarini ham eshitamiz, xo‘sh, bu Gruziyaning ichki ishlariga bevosita aralashish bo‘lmasa, bu nima?” — dedi Peskov.
Dmitriy Peskov Gruziya parlamentida xorijiy agentlar to‘g‘risidagi qonun loyihasi ko‘rib chiqilishini “Gruziya rahbariyatining mamlakatni ochiq aralashuvdan himoy qilishga bo‘lgan qat’iy istagi” deb atadi. Shuningdek, u shunday qonunlar dunyoning aksariyat mamlakatlarida mavjudligini aytdi.
13-may kuni Gruziya parlamenti qo‘mitasi xorijiy agentlar to‘g‘risidagi qonun loyihasini uchinchi o‘qishda qo‘llab-quvvatladi. Qonun loyihasiga qarshilar har kuni Tbilisida norozilik namoyishlari o‘tkazishmoqda.
So‘nggi bir necha kun ichida mamlakat poytaxtida qonun loyihasi ko‘rib chiqila boshlanganidan beri eng yirik mitinglar bo‘lib o‘tmoqda. Reuters agentligiga ko‘ra, 11-may kuni bo‘lib o‘tgan yurishda 50 mingdan ortiq kishi qatnashgan.
Izoh (0)