“Mendan qo‘rqasanmi?” — sobiq MXX binosi hududidagi daraxtlarni ko‘chirib o‘tkazayotgan firma rahbari fotografning boshiga ichimlik to‘kdi

Yaqinda ijtimoiy tarmoqlarda Toshkent shahri, Yunusobod tumani, Sayilgoh ko‘chasida eman daraxtlari kesib olib ketilayotgani haqida xabarlar tarqalgandi. 

Keyinroq Toshkent shahar hokimligi va Ekologiya vazirligi daraxtlar kesilmaganini, balki ko‘chirib o‘tkazilayotganini maʼlum qilgandi. Hokimlik va vazirlik “transplantatsiya”ni amalga oshirgan Muna Mag kompaniyasi rahbari Farrux Hakimovni maqtash bilan ovora bo‘lib, uni zo‘r yigit va innovator ekanligini eʼtirof etgan edi.

Poytaxt fotografi Kamil Yenikeyev ko‘chirib o‘tkazilgan chinorlarni o‘z ko‘zi bilan ko‘rish uchun bordi. Va u yerda Farrux Hakimovga duch keldi.

Bu videoni, albatta, ko‘ring. Bizning davlat idoralarimiz kimning yordami bilan “ko‘chirib o‘tkazish” deb ataladigan ishlarni amalga oshirayotganiga boqing. Hokimlik, Ekologiya, atrof-muhitni muhofaza qilish va iqlim o‘zgarishi vazirligi, huquq-tartibot idoralari o‘z fikr-mulohazalarini bildirishlariga yoki ish ochishlariga chin dildan umid qilaman, — deyiladi bloger Nikita Makarenko xabarida.

Qo‘shimcha qilinishicha, Ekologiya vazirligi bayonot bilan chiqib, quyidagilarni maʼlum qilgan:

Sobiq Davlat xavfsizlik xizmati binosi o‘rnida Radisson mehmonxonasi qurilishi uchun daraxtlarni ko‘chirib o‘tkazish noqonuniy bo‘lgan. Shahar Ekologiya boshqarmasi boshlig‘i Tursunpo‘lat Egamov kompaniya hech qanday tashkilotdan ruxsat olmasdan daraxtlarni ko‘chirib o‘tkazishga kirishganini tasdiqladi.