Isroil havo kuchlari Xon Yunis shahri yaqinidagi maktabga 9-iyul kuni hujum uyushtirishi oqibatida kamida 25 nafar falastinlik halok bo‘ldi. Bu haqda G‘azo Sog‘liqni saqlash vazirligi bayonotiga asoslanib, CNN nashri xabar berdi.
Manbada aytilishicha, Isroil aviatsiyasi maktab hududini ogohlantirishsiz o‘qqa tutgan. Oqibatda 25 kishi voqea joyida halok bo‘lgan, o‘nlab fuqarolar jiddiy jarohat olgan.
“Xon Yunis shahri sharqidagi Abasan shaharchasida ko‘chirilgan falastinliklar yashaydigan maktab darvozasi nishonga olingan. Bu ko‘chirilgan fuqarolarga nisbatan dahshatli qirg‘indir”, — deyiladi G‘azo Sog‘liqni saqlash vazirligi xabarida.
Rasmiylar jarohatlanganlar soni 53 nafar ekanligini xabar qilgan. Ularning baʼzilari o‘ta og‘ir darajada jarohatlangan. Qurbonlar soni ortishi mumkinligi xabar qilingan. Hodisada shikastlanganlarning ko‘pchiligi Nosir kasalxonasiga olib ketilgan.
Isroil harbiylari ham hodisa yuzasidan o‘z munosabatini bildirgan. Maktabga hujumdan maqsad 7-oktyabrdagi hujumda qatnashgan HAMAS harbiy qanoti rahbarini yo‘q qilish bo‘lgani aytilgan.
“Bugun kechqurun mudofaa kuchlari 7-oktyabr kuni Isroil janubida HAMAS tashkiloti tomonidan amalga oshirilgan hujumda ishtirok etgan harbiy qanoti yetakchisiga zarba berdi”, — deyilgan Isroil mudofaa kuchlari bayonotida.
Maʼlumot o‘rnida, Isroil avvalroq G‘azo markazidagi Falastinlik qochqinlar bo‘yicha BMT agentligi tomonidan boshqariladigan maktabga ham zarba bergan edi. Hujumda 16 nafar falastinlik halok bo‘lgan. UNRWA agentligiga qarashli al-Jauniy maktabida Nuseyrat lageridan ko‘chirilgan falastinliklar istiqomat qilayotgan bo‘lgan.
Izoh (0)