3-4-iyul kunlari Qozog‘iston poytaxti Ostona shahrida Shanxay Hamkorlik Tashkilotining 24-sammiti bo‘lib o‘tdi.
“Daryo” mazkur tadbirda qatnashgan mamlakat yetakchilarining fikr va mulohazalarini bir joyga jamladi.
O‘zbekiston prezidenti Shavkat Mirziyoyev SHHT oilasi jipsligini kuchaytirish va birgalikda rivojlanish tamoyilini hayotga izchil tatbiq qilish zarurligiga e’tibor qaratdi.
Shuningdek, O‘zbekiston prezidenti SHHTning Yaxshi qo‘shnichilik, ishonch va transchegaraviy sheriklik kodeksi qabul qilinishi hozirgi yangi sharoitda muloqotni mustahkamlash va ko‘p tomonlama hamkorlikni yanada chuqurlashtirish imkonini beradi, deb hisoblashini ma’lum qildi.
Bundan tashqari, Shavkat Mirziyoyev raqamli iqtisodiyotga o‘tish, sun’iy intellektni, ilg‘or IT qarorlarni joriy etish mamlakatlar raqobatbardoshligida hal qiluvchi ahamiyatga egaligini ta’kidladi.
SHHT bosh kotibi Chjan Min esa hozirgi murakkab o‘zgarishlar sharoitida aʼzo davlatlar o‘rtasida o‘zaro ishonch va hamkorlikni mustahkamlash muhimligini aytib o‘tdi.
Rossiya prezidenti Vladimir Putin SHHT doirasidagi sheriklik munosabatlariga katta e’tibor qaratishini ma’lum qilib, tashkilot dolzarb masalalarga kollegial yechim izlash tamoyillari asosida izchil rivojlanib borayotganini mamnuniyat bilan qayd etdi.
Xitoy yetakchisi Si Szinpin Shanxay hamkorlik tashkilotiga aʼzo davlatlar birdamlikni namoyish qilishlari hamda tashqi aralashuv urinishlariga birgalikda qarshilik ko‘rsatishlari kerakligini aytib o‘tdi.
Qozog‘iston prezidenti Qosim Jo‘mart-To‘qayev SHHT “Shanxay ruhi”ning do‘stlik, ahil qo‘shnichilik, teng huquqlilik va o‘zaro qo‘llab-quvvatlash asosida faoliyat yurituvchi davlatlararo munosabatlarning samarali mexanizmiga aylanganini ta’kidladi.
Qirg‘iziston prezidenti Sadir Japarov qabul qilingan Shanxay Hamkorlik Tashkilotining “Adolatli tinchlik va totuvlik yo‘lida jahon birdamligi to‘g‘risida”gi tashabbusiga e’tibor qaratdi.
Tojikiston rahbari Emomali Rahmon o‘z chiqishi davomida Afg‘oniston masalasiga e’tibor qaratib, barchani qardosh afg‘on xalqiga yordam ko‘rsatishni davom ettirishga chaqirdi.
Izoh (0)