Isroil uning armiyasi Livanga keng ko‘lamli hujum uyushtirsa, Eron yahudiy davlatiga qarshi “qirg‘in urushi” boshlashi haqidagi tahdidlarga javob qaytardi. Bu haqda Isroil tashqi ishlar vaziri Isroil Kats xabar berdi.
Katsning so‘zlariga ko‘ra, agar “Hizbulloh” Isroil hududini o‘qqa tutishda davom etsa, Livanga qarshi harbiy kuch qo‘llaniladi.
Mening Eronga javobim aniq. Agar “Hizbulloh” otishmalarni to‘xtatmasa va janubiy Livandan chekinmasa, unga qarshi to‘liq kuch bilan harakat qilamiz — shimoliy hududimizda xavfsizlik tiklanguncha. Bizni yo‘q qilish bilan tahdid qilayotgan rejim (Eron nazarda tutilgan) o‘zini o‘zi yo‘q qilishga hukm bo‘ladi, — dedi Isroil Kats.
Avvalroq Eronning BMTdagi missiyasi yahudiy davlati Livanga keng ko‘lamli hujum qilgan taqdirda “qirg‘in urushi” boshlanishi haqida ogohlantirgandi.
- 18-iyun kuni Isroil mudofaa kuchlari Livanga hujum qilish uchun jangovar rejalar tasdiqlanganini e’lon qildi. Shundan so‘ng, “Hizbulloh” guruhi rahbari Hasan Nasrulloh to‘laqonli urush bo‘lsa, Isroilda “hech qanday joy” qolmasligidan ogohlantirdi.
Isroil bizni quruqlikda, dengizda va havodan (hujum qilishimizni) kutishi kerak. Dushman haqiqatan ham qarshilik Isroil shimolidagi Galileyaga (Livan bilan chegaradosh hudud) kirib kelishidan qo‘rqadi. Livanni urushga majburlash kontekstida bu amalga oshishi mumkin, — degan “Hizbulloh” yetakchisi.
U Isroil “qo‘rqishi” kerak bo‘lgan tomon ekani, “Hizbulloh” Isroil bilan qarshilik boshlangan oktyabr oyidan beri qurollarining faqat “bir qismini” qo‘llaganini aytgan.
Biz yangi qurollarga ega bo‘ldik. Ayrim qurollarimizni takomillashtirdik, boshqalarini kelgusi kunlarga saqlab qolamiz. Yillar oldin 100 ming jangchi haqida gapirgan bo‘lsak, hozirda bu raqamdan ancha oshib ketdik, — degan u.
- 26-iyun kuni esa Isroil mudofaa vaziri Yoav Galant Isroil Livanni “tosh davriga qaytarishi” va Livandagi “Hizbulloh” harakati bilan yuzaga kelishi mumkin bo‘lgan har qanday konfliktda jiddiy zarar keltirishi mumkinligini aytdi.
Izoh (0)