Исроил унинг армияси Ливанга кенг кўламли ҳужум уюштирса, Эрон яҳудий давлатига қарши “қирғин уруши” бошлаши ҳақидаги таҳдидларга жавоб қайтарди. Бу ҳақда Исроил ташқи ишлар вазири Исроил Кац хабар берди.
Кацнинг сўзларига кўра, агар “Ҳизбуллоҳ” Исроил ҳудудини ўққа тутишда давом этса, Ливанга қарши ҳарбий куч қўлланилади.
Менинг Эронга жавобим аниқ. Агар “Ҳизбуллоҳ” отишмаларни тўхтатмаса ва жанубий Ливандан чекинмаса, унга қарши тўлиқ куч билан ҳаракат қиламиз — шимолий ҳудудимизда хавфсизлик тиклангунча. Бизни йўқ қилиш билан таҳдид қилаётган режим (Эрон назарда тутилган) ўзини ўзи йўқ қилишга ҳукм бўлади, — деди Исроил Кац.
Аввалроқ Эроннинг БМТдаги миссияси яҳудий давлати Ливанга кенг кўламли ҳужум қилган тақдирда “қирғин уруши” бошланиши ҳақида огоҳлантирганди.
- 18 июнь куни Исроил мудофаа кучлари Ливанга ҳужум қилиш учун жанговар режалар тасдиқланганини эълон қилди. Шундан сўнг, “Ҳизбуллоҳ” гуруҳи раҳбари Ҳасан Насруллоҳ тўлақонли уруш бўлса, Исроилда “ҳеч қандай жой” қолмаслигидан огоҳлантирди.
Исроил бизни қуруқликда, денгизда ва ҳаводан (ҳужум қилишимизни) кутиши керак. Душман ҳақиқатан ҳам қаршилик Исроил шимолидаги Галилеяга (Ливан билан чегарадош ҳудуд) кириб келишидан қўрқади. Ливанни урушга мажбурлаш контекстида бу амалга ошиши мумкин, — деган “Ҳизбуллоҳ” етакчиси.
У Исроил “қўрқиши” керак бўлган томон экани, “Ҳизбуллоҳ” Исроил билан қаршилик бошланган октябрь ойидан бери қуролларининг фақат “бир қисмини” қўллаганини айтган.
Биз янги қуролларга эга бўлдик. Айрим қуролларимизни такомиллаштирдик, бошқаларини келгуси кунларга сақлаб қоламиз. Йиллар олдин 100 минг жангчи ҳақида гапирган бўлсак, ҳозирда бу рақамдан анча ошиб кетдик, — деган у.
- 26 июнь куни эса Исроил мудофаа вазири Йоав Галант Исроил Ливанни “тош даврига қайтариши” ва Ливандаги “Ҳизбуллоҳ” ҳаракати билан юзага келиши мумкин бўлган ҳар қандай конфликтда жиддий зарар келтириши мумкинлигини айтди.
Изоҳ (0)