Farg‘ona viloyatida olib borilgan tezkor tadbirlarda jinoyat olami vakillari bilan yaqin aloqada bo‘lgan va bir qancha jinoyatlarni sodir etishda gumonlanayotgan shaxs ushlandi.
Viloyat IIB matbuot xizmatining xabar qilishicha, Marg‘ilon shahri hududida “polojenets” ma’qomiga erishish uchun harakat qilayotgan shaxs to‘g‘risida ma’lumotlar olingan. Ushbu shaxs 1990-yilda tug‘ilgan, Farg‘ona viloyati Qo‘shtepa tumanida yashovchi, muqaddam Jinoyat kodeksining 166-moddasi (talonchilik) 2-qismi bilan sudlangan Abdullo Egamberdiyev ekani aniqlandi.
Ma’lum qilinishicha, u 2022—2023-yillarda “Baxti Tashkentskiy” — qonundagi o‘g‘ri maqomini olgan Baxtiyor Qudratilloyev hamda “Salimboyvachcha” — Salim Abduvaliyev bilan tanishib, yaqin aloqada bo‘lib, jinoyat olamida yetakchilikka intilib kelgan.
Farg‘ona viloyat IIB xodimlari tomonidan o‘tkazilgan tezkor tadbir davomida Abdullo Egamberdiyev Farg‘ona shahrining Qirguli mavzesida qo‘lga olingan.
Unga nisbatan Jinoyat kodeksining 168-moddasi (firibgarlik) 2-qismi “a”, “b” bandlari, 28-moddasi orqali 211-moddasi (pora berish) 1-qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Hozirda dastlabki tergov harakatlari olib borilmoqda.
Izoh (0)