Ijtimoiy tarmoqlarda xotin-qizlarning kiyimlarini muhokama qilib, ularning qadr-qimmatini kamsitib, obro‘sizlantirgan erkak 15 sutkaga qamaldi. Bu haqda IIV matbuot xizmati xabar berdi.
Aprel oyida “Zamonaviy ayollar” klubi tomonidan Atlas Party nomli milliy liboslar targ‘ibot tadbiri o‘tkazilgan va tadbirdan lavhalar ijtimoiy tarmoqlarga joylashtirilgan. Ushbu lavhalarga nisbatan nomaʼlum erkakning mazkur targ‘ibot tadbirida ishtirok etgan ayollarni obro‘sizlantiruvchi haqoratli so‘zlari aks etgan videorolik ijtimoiy tarmoqlarda tarqalgan bo‘lib, keng muhokamalarga sabab bo‘ldi.
Shu sababli, mazkur holat yuzasidan Atlas Party tadbirining bir qator ishtirokchilari ichki ishlar idoralariga ushbu shaxsga nisbatan qonuniy chora ko‘rish uchun ariza bilan murojaat qilgan.
Olib borilgan tezkor-surishtiruv tadbirlar natijasida mazkur shaxs Sirdaryo viloyatida tug‘ilgan 36 yoshli fuqaro M.D. ekani aniqlangan.
23-aprel kuni fuqaro M.D. Shayxontohur tumani IIO FMBga taklif etilgan hamda u o‘zining shaxsiy diniy qarashlaridan kelib chiqqan holda atlas targ‘ibotini olib borgan ayollarga nisbatan haqoratli so‘zlar ishlatgani taʼkidlab o‘tgan.
Ushbu huquqbuzarlik holati tegishli tartibda Shayxontohur tuman sudi tomonidan ko‘rib chiqilib, fuqaroga Maʼmuriy javobgarlik to‘g‘risidagi kodeksning 183-moddasi (mayda bezorilik) ga asosan 15 sutka muddatga maʼmuriy qamoq jazosi tayinlangan.
Eslatib o‘tamiz, 2023-yilda Toshkentda ayolni haqorat qilib, unga paket uloqtirgan AQSH fuqarosi jarima to‘lagan edi.
Izoh (0)