“Andijon viloyatida “Ipak yo‘li” erkin iqtisodiy zonasi faoliyatini tashkil etish chora-tadbirlari to‘g‘risida”gi Vazirlar Mahkamasi qarori qabul qilindi, deb xabar beradi Norma.
Prezidentning fevral oyidagi qarori bilan Andijon viloyati Andijon tumanida “Ipak yo‘li” EIZ tashkil etiladi. Boshqaruv xodimlari soni 7 nafardan iborat bo‘lgan “Ipak yo‘li” erkin iqtisodiy zonasi direksiyasi davlat unitar korxonasi shaklida tashkil etiladi.
Hujjat bilan “Ipak yo‘li” EIZ direksiyasining tuzilmasi va ustavi tasdiqlangan.
Quyidagilar “Ipak yo‘li” EIZning asosiy vazifalari va faoliyat yo‘nalishlari hisoblanadi:
- tashqi bozorlarda talab etilayotgan va import o‘rnini bosuvchi, yuqori qo‘shilgan qiymatga ega sanoat mahsulotlarini ishlab chiqarish uchun to‘g‘ridan to‘g‘ri xorijiy va mahalliy investitsiyalarni jalb etish;
- mahalliy xomashyo va materiallar negizida mustahkam kooperatsiya aloqalarini o‘rnatish, “Ipak yo‘li” EIZ ishtirokchilari o‘rtasida hamda respublikaning boshqa hududlari bilan sanoat kooperatsiyasini rivojlantirish asosida yuqori darajadagi sanoat ishlab chiqarishini kengaytirish;
- viloyatning ishlab chiqarish va resurs salohiyatidan samarali foydalanish asosida sanoat mahsulotlari ishlab chiqarishni kengaytirish, mahalliy aholi uchun doimiy ish o‘rinlari yaratish.
Hujjat Qonun hujjatlari maʼlumotlari milliy bazasida eʼlon qilingan va 2024-yil 2-maydan kuchga kirdi.
Eslatib o‘tamiz, 2019-yilda prezident farmoniga muvofiq, Andijon viloyatining Andijon tumanida “Andijon-farm” erkin iqtisodiy zonasi tashkil etilgandi. Undan bir yil oldin esa Namangan viloyati Chust tumanida erkin iqtisodiy zona tashkil etilishi to‘g‘risida xabar berilgan edi.
Izoh (0)