Toshkent viloyati Chirchiq shahar Ichki ishlar boshqarmasi tergov hibsxonasida 22 yoshli yigit vafot etgani haqida xabar berilgan edi. Ombudsman holat yuzasidan o‘rganish ishlarini boshladi.
Viloyat IIBB matbuot kotibi bergan ma’lumotga ko‘ra, 2001-yilda tug‘ilgan A.O‘. Jinoyat kodeksining 169-moddasi 3-qismi “v” bandi (o‘g‘rilik, ko‘p miqdorda) va 168-moddasi 3-qismi “b” bandi (firibgarlik, takroran yoki xavfli retsidivist tomonidan) bilan qo‘zg‘atilgan jinoyat ishida ayblangan.
Tergov davomida, A.O‘. muqaddam ham Jinoyat kodeksining 164-moddasi 2 qismi “a” bandi (bosqinchilik, qurol yoki qurol sifatida foydalanish mumkin bo‘lgan boshqa narsalarni ishlatib) bilan sudlangani inobatga olinib, unga nisbatan qamoqqa olish tarzidagi ehtiyot chorasi qo‘llangan.
Yigitning o‘zini osgani aytilgan bo‘lsa-da, uning burni singani va tanasida jarohatlar borligi aniqlangan.
Ombudsman mazkur holat Oliy Majlisning inson huquqlari bo‘yicha vakili tomonidan nazoratga olinib, ishga taalluqli ma’lumotlar so‘rab olingani, ishga oid hujjatlar o‘rganilayotganini bildirdi.
“Ombudsman yuqorida qayd etilgan xabarlar yuzasidan tekshiruv har tomonlama, to‘liq va qonuniy o‘tkazilishini nazorat qiladi”, — deyiladi xabarda.
Holat yuzasidan Chirchiq shahar prokuraturasi tomonidan tergovga kadar tekshiruv harakatlari olib borilmoqda va marhumga sud-ekspertizasi tayinlangan.
Izoh (0)