Xitoy vakili Vang Kejian 17-mart kuni HAMAS siyosiy rahbari Ismoil Haniya bilan Qatarda uchrashgan. Bu haqda CNN nashri xabar berdi.
Xabarda aytilishicha, Qatarda bo‘lib o‘tgan uchrashuv chog‘ida Xitoy va HAMAS vakillari G‘azo mojarosi va boshqa xalqaro masalalar yuzasidan fikr almashgan. Uchrashuvda HAMAS vakili Ismoil Haniya tajovuz va qirg‘inlarni tezda to‘xtatish, mustaqil Falastin davlatini barpo etish bo‘yicha siyosiy maqsadlar va intilishlarga erishish zarur ekanligini taʼkidlagan. Isroil harbiylari G‘azodan chiqib ketishi muammoga yagona yechim ekanini urg‘ulagan.
O‘tgan haftada Xitoy rasmiysi Vang Kejian okkupatsiya qilingan G‘arbiy Sohilga ham tashrif buyurgan edi. Elchi u yerda Falastin tashqi ishlar vaziri Riyod al-Malikiy bilan uchrashib, muzokaralar o‘tkazgan. Uchrashuvda Xitoy rasmiysi uning hukumati G‘azodagi urush va og‘ir gumanitar vaziyatdan “qattiq xavotirda” ekanligini, Xitoy o‘t ochishni to‘xtatish va tinch aholini himoya qilish bo‘yicha qattiq ish olib borayotganini aytgan.
G‘arbiy Sohildan so‘ng janob Vang Isroilga tashrif buyurib, Tel-Avivning Osiyo va Tinch okeani mintaqasi bo‘yicha Tashqi ishlar vazirligi rasmiysi Hagai Shagrir bilan uchrashuvda bo‘lgan. Elchi Isroil rasmiylariga to‘liq o‘t ochishni to‘xtatish, urushni to‘xtatish, insonparvarlik yordamini kafolatlash va tinch aholini himoya qilish ustuvor vazifa ekanini taʼkidlagan. Ikki davlat yechimi borasidagi chaqiriqlarni takrorlagan.
Elchi Vang Kejian 7-oktyabr voqealaridan beri Yaqin Sharqqa tashrif buyurayotgan ilk Xitoy rasmiysidir. Uning safari 10-martda boshlanib, haligacha davom etmoqda.
Izoh (0)