O‘zbekistonlik ayol Bangalor shahridagi mehmonxonalardan birida sirli sharoitda o‘lik holda topildi. Politsiya ayolga suiqasd qilinganini gumon qilmoqda. Bu haqda Deccan Herald xabar berdi.
Xabarga ko‘ra, ayol 13-mart kuni soat 23:00 atrofida mehmonxona xodimlari tomonidan xonasida harakatsiz yotgan holda topilgan. Xodimlar xonani asosiy kalit bilan ochishiga to‘g‘ri kelgan, chunki ayol uzoq vaqt davomida o‘z nomeridan chiqmagan va bir necha bor telefon qo‘ng‘iroqlariga javob bermagan.
Politsiya komissari o‘rinbosari Shekhar Tekkannavar ayol bo‘g‘ilgani, uning tanasida hech qanday iz bo‘lmaganini aytmoqda. Mehmonxona xodimlari O‘zbekiston fuqarosini oxirgi marta 13-mart kuni tushlik paytida xona uchun pul to‘layotgan paytda ko‘rgan.
Keyinroq mehmonxona xodimlari eshikda “Bezovta qilinmasin” belgisi qayd etilganini ko‘rgan. Biroz vaqtdan so‘ng, uning mehmonxonada ro‘yxatdan o‘tishga yordam bergan agentlik telefon orqali ayol bilan bog‘lanishga harakat qilgan. Javob olmaganidan keyin, agent mehmonxona bilan bog‘langan. Keyin xodimlar asosiy kalit bilan eshikni ochgan.
Ayolni yerda choyshab o‘ralgan, jonsiz holatda topishgan. Shundan so‘ng, xodimlar politsiyani chaqirgan. Politsiya tergov davom etayotganini aytmoqda. Ammo dastlabki dalillar qotillikka ishora qilmoqda, jumladan, ayol bo‘g‘ib o‘ldirilgan bo‘lishi mumkinligi gumon qilinmoqda.
Izoh (0)