Myanma xuntasi mamlakatdagi barcha yosh erkak va ayollar uchun majburiy harbiy xizmatni joriy qildi. Bu haqda Reuters xabar berdi.
Tegishli qaror mamlakatning turli hududlarida kengroq avtonomiya uchun kurashayotgan qurolli isyonchi kuchlarni jilovlash fonida amalga oshmoqda. 18 yoshdan 35 yoshgacha bo‘lgan erkaklar va 18 yoshdan 27 yoshgacha bo‘lgan ayollar ikki yilgacha, 45 yoshgacha bo‘lgan shifokorlar esa uch yilgacha xizmat qilishlari kerak. Favqulodda vaziyat amal qilganda xizmat muddati jami besh yilga uzaytirilishi mumkin.
Myanmada harbiylar 2021-yilgi davlat to‘ntarishi natijasida hokimiyatni saylangan hukumatdan tortib olganidan beri tartibsizlik hukm surmoqda. Oktyabr oyidan beri “Tatmadau” (armiya nomi) isyonchi guruhlar va xuntaga qarshi qurol ko‘targan ittifoqchi demokratiya jangchilari bilan hujumda yo‘qotishlarga uchradi.
Bu 1962-yilda sobiq Britaniya mustamlakasida hokimiyatni qo‘lga kiritgandan beri harbiylar duch kelgan eng katta muammodir.
“Millatni himoya qilish mas’uliyati nafaqat askarlar, balki barcha fuqarolarga tegishli. Shuning uchun barchani harbiy xizmat haqidagi qonunga g‘urur bilan rioya qilishga chaqiraman”, — dedi xunta vakili Zau Min Tun.
Majburiy harbiy xizmat to‘g‘risidagi qonun 2010-yilda qabul qilingan, ammo hali kuchga kirmagan. Qonunga rioya qilmaganlar besh yilgacha ozodlikdan mahrum etilishi mumkin.
Izoh (0)