Бугун, 8 февраль куни блогер Аброр Мухтор Алий ички ишлар ходимларининг қонуний талабларига бўйсунмаганликда айбланиб ҳибсга олингани, унга нисбатан 15 сутка маъмурий қамоқ жазоси тайинлангани ҳақида хабар берилган эди. “Дарё” манбасига кўра, диний блогернинг қўлга олиниши “кўча” болаларига қарши ўтказилаётган “Долзарб 40 кунлик” тадбири билан боғлиқ бўлиши ҳам мумкин.
Блогер ижтимоий тармоқлардаги чиқишларидан бирида “Долзарб 40 кунлик” тадбирлари доирасида қўлга олинган “Саидазиз медгородок” лақаби билан танилган Саидазиз Саидалиев билан яқин эканини айтганди.
Ҳа, Саидазиз менинг яқин укам, дедим. Унинг гапига туриб бера олишини кўрганман. У мен учун керакли пайтда туриб берган, мен ҳам унга керакли пайтда туриб бераман, — деган эди Аброр Мухтор Алий.
Эслатиб ўтамиз, Саидазиз Саидалиев 2023 йилнинг декабрь ойи бошларида қўлга олингани эълон қилинганди. У Тошкент шаҳар ИИББ ҳузуридаги Тергов бошқармаси томонидан Жиноят кодексининг 165-моддаси (товламачилик) билан айбланмоқда.
“Саидазиз медгородок” лақаби билан танилган 1987 йилда туғилган Саидазиз Саидалиев спорт билан шуғулланган жисмонан бақувват бир нечта шахсни ўз атрофига жалб қилиб, бир нечта жиноятларни содир этган. Хусусан, қарздорлик ва бошқа муаммолари бўлган шахсларнинг муаммоларини қонунни четлаб ўтган ҳолда ҳал қилиб бериш эвазига моддий жиҳатдан манфаатдор бўлиш, таҳдидлар йўли билан пул маблағларини ноқонуний қўлга киритиш, безорилик ва тамагирлик ҳолатлари шулар жумласидан.
Жиноят иши доирасида гумон қилинувчи Саидазиз Саидалиев ва бошқа бир нечта шахсларга нисбатан қамоққа олиш тарзидаги эҳтиёт чораси қўлланган. Тергов давом этмоқда.
Изоҳ (0)