28-yanvar kuni “Yangi O‘zbekiston yulduzlari” madaniyat va san’at milliy mukofoti g‘oliblarini tantanali taqdirlash marosimi bo‘lib o‘tdi. Madaniyat vazirligi tomonidan tashkil etilgan joriy yilgi ko‘rik-tanlovda teatr, kino, estrada, an’anaviy ijrochilik, sirk, askiya, baxshichilik singari 20 ta nominatsiya bo‘yicha yilning eng yaxshilari taqdirlandi.
Dastlab nomzodlar yil yakuni bo‘yicha ijodiy faoliyatida erishgan yutuqlaridan kelib chiqqan holda “Yangi O‘zbekiston yulduzlari” madaniyat va san’at milliy mukofoti komissiyasi tomonidan tanlab olingan bo‘lsa, har bir nominatsiya bo‘yicha eng yaxshi 3 nafar nomzod tanlab olinib, “milliytanlov.uz” platformasi orqali ovozga qo‘yildi. Ya’ni g‘oliblar jamoatchilik tomonidan aniqlandi.
Kino, teatr va ommaviy tomoshalar yo‘nalishida “Yangi O‘zbekiston yulduzlari” madaniyat va san’at milliy mukofotini qo‘lga kiritganlar:
- Yilning eng yaxshi askiyachisi — Mamasidiq Alixonov
- Yilning eng yaxshi sirk artisti — Yunus Boboqulov
- Yilning eng yaxshi qo‘g‘irchoq spektakli — “Cho‘pon afsonasi” spektakli (Qoraqalpoq davlat qo‘g‘irchoq teatri)
- Yilning eng yaxshi badiiy filmi — “O‘zbek qizi”
- Yilning eng yaxshi spektakli — “Layli va Majnun”
- Yilning eng yaxshi teatr rejissori — Doston Xaqberdiyev
- Yilning eng yaxshi teatr aktyori — Azizbek Nazarimbetov
- Yilning eng yaxshi teatr aktrisasi — Shoxsanam Obloqulova
“Tasviriy va amaliy san’at” yo‘nalishida “Yangi O‘zbekiston yulduzlari” madaniyat va san’at milliy mukofotini qo‘lga kiritganlar:
- Yilning eng yaxshi aholiga xizmat qilgan kutubxonasi – Surxondaryo viloyati Ko‘zi ojizlar maxsus kutubxonasi (Xusan Islomqulov)
- Yilning eng yaxshi milliy madaniyat markazi – O‘zbekiston qozoq milliy madaniyat markazi
- Yilning eng yaxshi adibi (shoiri) – Iqbol Mirzo
- Yil kashfiyoti – Zohidjon Jumanazarov
“Estrada va an’anaviy, opera xonandaligi, musiqa ijrochiligi va raqs san’ati” yo‘nalishida “Yangi O‘zbekiston yulduzlari” madaniyat va san’at milliy mukofotini qo‘lga kiritganlar:
- Yilning eng yaxshi an’anaviy ayol xonandasi – Mohichehra Jumanova
- Yilning eng yaxshi an’anaviy erkak xonandasi – Eldorbek Maxsudov
- Yilning eng yaxshi simfonik orkestri – Milliy simfonik orkestri (Alibek Abdurahmonov)
- Yilning eng yaxshi raqqosasi – Moxina Ergasheva
- Yilning eng yaxshi opera ijrochisi – Aminzoda Jumaniyozov
- Yilning eng yosh baxshisi – Azamat Elmuratov
- Yilning eng yaxshi estrada ayol xonandasi – Afruza
- Yilning eng yaxshi estrada erkak xonandasi – Janob Rasul
Eslatib o‘tamiz, hukumat qarori bilan mamlakatimiz madaniyati va san’atini yuksaltirish, uning xalqaro miqyosdagi nufuzini oshirishda salmoqli, serqirra ijodi bilan katta hissa qo‘shgan iste’dodli ijodkorlarni har yili an’anaviy tarzda “Yangi O‘zbekiston yulduzlari” milliy mukofoti bilan taqdirlash belgilangan.
Mukofotga teatr, sirk, musiqa sohasining estrada, an’anaviy, akademik, folklor, bastakorlik, kompozitorlik, raqs, shuningdek, tasviriy va amaliy san’at, badiiy ijod hamda madaniyat va san’atning boshqa yo‘nalishlarida faoliyat yuritayotgan soha vakillari orasidan nomzodlar ko‘rsatilishi mumkin.
Mukofotga sazovor bo‘lgan ijodkorlar bazaviy hisoblash miqdorining 100 baravari miqdorida pul mukofoti bilan rag‘batlantiriladi hamda maxsus statuetka va sertifikat topshiriladi.
Taqdimotdan tayyorlangan maxsus reportajni quyida tomosha qilishingiz mumkin:
Izoh (0)