Ukraina Bosh razvedka boshqarmasi rahbari Kirill Budanov “Vagner” rahbari Yevgeniy Prigojinning o‘limiga oid tasdiqlangan dalillar yo‘qligini aytdi. Bu haqda Financial Times xabar berdi.
Kirill Budanov suhbat davomida Prigojinning o‘limi haqida “xulosa chiqarishga shoshilmayotganini” ta’kidladi. U Rossiya rasmiylari “Vagner” rahbarining o‘limiga aloqadorligini rad etishi va go'yo Prigojinning o'limini isbotlagan ekspertizaga ishora qilishini aytdi.
Biroq Budanovning qayd etishicha, Prigojinning jasadi hech qachon jamoatchilikka ko‘rsatilmagan.
“Men u o‘lmagan yoki o‘lgan deb aytmayapman. Aytmoqchimanki, uning o‘lganiga birorta dalil yo‘q”, — deya tushuntirdi Budanov.
Razvedka rahbari “Vagner” guruhini tarqatib yuborish haqidagi mish-mishlarga ham javob berdi. Budanovga ko‘ra, bu jangari guruh hozir ham mavjud.
Izoh (0)