Italiya Yevropa Ittifoqini o‘z armiyasini yaratishga chaqirdi

Italiya tashqi ishlar vaziri Antonio Tayani Yevropa Ittifoqi urushlarning oldini oladigan va tinchlikni saqlaydigan o‘z qurolli kuchlarini yaratishi kerakligini aytdi. Bu haqda Reuters xabar berdi.

Uning so‘zlariga ko‘ra, mudofaa sohasida Yevropaning yaqin hamkorligi u rahbarlik qilayotgan Forza Italia partiyasi uchun ustuvor vazifa hisoblanadi.

“Agar dunyoda tinchlikparvar bo‘lishni istasak, bizga Yevropa armiyasi kerak. Bu samarali Yevropa tashqi siyosatiga ega bo‘lishning fundamental shartidir. AQSH, Xitoy, Hindiston, Rossiya kabi kuchli o‘yinchilarga ega bo‘lgan, Yaqin Sharqdan Hind-Tinch okeanigacha bo‘lgan inqirozli dunyoda Italiya, Germaniya, Fransiya yoki Sloveniya fuqarolarini faqat mavjud narsalar, ya’ni Yevropa Ittifoqi himoya qilishi mumkin”, — dedi u.

Tayani, shuningdek, 27 davlatdan iborat Yevropa Ittifoqi o‘z rahbariyatini soddalashtirishi va Yevropa Kengashi raisi va Yevropa Komissiyasi raisining hozirgi tuzilmasidan ko‘ra yagona prezidentga ega bo‘lishi kerakligini aytdi.

Italiya TIV rahbari Rossiyaning Ukrainaga keng ko‘lamli bosqinidan so‘ng Yevropa mudofaa sohasidagi hamkorlik siyosiy kun tartibiga ko‘tarilganini ta’kidladi. Biroq, sa’y-harakatlarda NATOning kengayishiga ko‘proq e’tibor qaratildi, Yevropa Ittifoqiga a’zo Finlyandiya o‘tgan yili alyansga qo‘shildi va Shvetsiya ham a’zo bo‘lishni rejalashtirmoqda.