Erondagi masjidda qasos bayrog‘i ko‘tarildi

Eronning Qum shahridagi “Jamkaron” masjidi tepasida qizil bayroq ko‘tarildi. Bu haqda Eronning Fars agentligi ma’lum qildi.

Kerman shahridagi teraktdan so‘ng masjid gumbazida qizil bayroq paydo bo‘lgan, xuddi shu bayroq 2020-yilda Eron Islom inqilobi qo‘riqchilari korpusi generali Qosim Sulaymoniy o‘limidan keyin ko‘tarilgan edi.

Amerikaning CNBC telekanali 2020-yilda ta’kidlaganidek, shia an’analaridagi qizil bayroqlar nohaq to‘kilgan qonni ham, o‘ldirilgan odam uchun qasos olishga chaqiriqni ham anglatadi.

3-yanvar, chorshanba kuni Eron janubi-sharqidagi Kerman shahrida Sulaymoniy vafotining to‘rt yilligi xotirasiga motam marosimlari chog‘ida portlashlar sodir bo‘ldi. IRNA agentligi maʼlumotlariga ko‘ra, oqibatda 89 kishi halok bo‘lgan, ulardan 12 nafari 15 yoshgacha bo‘lgan bolalardir. Hammasi bo‘lib 284 kishi jarohatlangan.

Eron hukumati 4-yanvarni halok bo‘lganlar uchun milliy motam kuni deb e’lon qildi, mamlakat prezidenti Ibrohim Raisi esa terakt tashkilotchilari va aybdorlari aniqlanib, jazolanishini aytdi. Shu bilan birga, Raisiy portlashlar uchun Isroil va AQSHni aybladi, ular esa voqeaga aloqador emasligini da’vo qildi. 

Keyinroq “Islomiy davlat” terrorchilik guruhi Kermandagi ikkita portlash uchun javobgarlikni o‘z zimmasiga oldi. Terrorchilarga yaqin Telegram kanallarida e’lon qilingan bayonotda ISHIDning ikki a’zosi olomon orasida o‘zini portlatib yuborgan.