“Maximum” кулгу жамоаси актёри Ойбек Тешабоев YouTube’даги Chotki.tv каналига берган интервьюсида вайнлар сабаб оилада кўп муаммоларга учраши ва видеоларини яқинлари кўришини истамаслиги ҳақида гапирди.
— Вайнларни фақат тирикчилик учун суратга оламан. Аммо бундан кўпинча уяламан. Онам-ку, уларни кўрмайди, аммо бошқа оила аъзоларим ҳам кўришларини истамайман. Кўча-куйда бирорта танишим “Ана видеода бундай чиқибсиз”, деса ҳам хижолат чекаман. Қизлар билан видео суратга олишим албатта, аёлимга ёқмайди. Бу борада кўп марта низоли вазиятларга борганмиз. Аёлимни ҳам тўғри тушунаман, рашк қилади. Бир-икки марта муаммо қилганди “Шу видеонинг ортидан келадиган реклама пули билан сенга кўйлак олиб беряпман”, деб ичини қизитиб қўйдим. Шундай кейин индамади.
Оиламдаги қиз-аёлларнинг суратини ижтимоий тармоқларга жойлашни умуман истамайман. Бир марта раҳматли бувим билан тушган расмимизни жойлаганман холос. Рашкчи инсон бўлганим учун сингилларимни ҳам ўқитмаганмиз, эгасига топшириб юборгунга қадар кўча-куйда юришини ҳам жиддий назорат қилардим, — дейди Ойбек Тешабоев.
Комик актёр Тошкентда пулсизликдан қийналгани ва топиб олган пулининг эгаси чиқса қайтариш нияти борлиги ҳақида гапирди.
— Уйдагиларга магистратурага кирдим деб алдаб, “Шоввозлар”нинг репетицияларида иштирок этардим. Ўша пайтлари “Ойбек” метро яқинида ижара уйда яшардим. Репетициялар эса Ўзбекистон Миллий университетида бўларди. Бир куни ҳатто, йўлкирага ҳам пул тополмай қолдим. Ижара уйдаги танга пулларнинг барини йиғиб, битта жетонга етадиган пул тўпладим. “Амаллаб репетицияга борсам, у ерга йигитлардан пул олиб турарман”, деб йўлга тушдим. “Беруний” метросидан чиқишда йўлдан тўртбурчак қилиб тахланган долларни топдим. Икки ёзувини кўриб “Икки долларни майдаласам, ҳарна йўл пулим бўларкан”, деб секингина пулни чўнтагимга солиб, сал нарига бориб уни очдим. Не кўз билан қарайки, у 2 эмас 20 АҚШ доллари экан. Шунақа қувониб кетганман. Йўлкира билан бирга тушлик ҳам қиларканман, деганман. Ҳозир ҳам шу пулнинг эгаси чиқса, қайтаришим керак деб кўп ўйлайман. Аммо ўша инсон менга керакли вақтида пулини йўқотган экан. У сабаб анча муаммоларим ечимини топган, — дейди Ойбек Тешабоев.
Ойбек Тешабоев “Миллион”дан кетишининг сабаби ва “Maximum” жамоасининг рейтинг ололмаётганига муносабатини билдирди.
— “Шоввозлар” жамоасининг концертини ташкил қилиш борасида Даврон Кобуловнинг ёнига борганман. “Майли қиламиз, аммо тўрт иштирокчи билан концерт бериш қийин. Яъни янги аъзоларни олишингиз керак”, деган. Аммо концерт ғояси пишгунига қадар “Миллион” иккига ажралган ва жамоа таркибига янги аъзолар керак бўлган. Шу сабаб “Шоввозлар”даги тўрт иштирокчи “Миллион”га қўшилганмиз. Нега жамоа таркибидан чиқиб кетганимиз ҳақида эса гапиришни истамайман. Шундай бўлиши керак бўлган, бўлди.
“Maximum” нега кўтарилиб кетмаётгани ҳақидаги саволга келсак, жамоанинг ўзига яраша мухлислари бор. Қўлдан келганча ҳаракат қилаяпмиз, — дейди Ойбек Тешабоев.
Изоҳ (0)