Shavkat Mirziyoyev 23-noyabr kuni O‘zbekiston Milliy teleradiokompaniyasini (MTRK) moliyaviy qo‘llab-quvvatlash bo‘yicha qo‘shimcha chora-tadbirlar to‘g‘risidagi qarorni imzoladi.
Hujjatda prezidentning 2016-yil 27-iyundagi PQ-2553-son qaroriga asosan Tiklanish va taraqqiyot jamg‘armasi tomonidan MTRKga ajratilgan kredit bo‘yicha to‘lovlarni kechiktirish uchun hisoblangan penyalar hisobdan chiqariladi. Teleradiokompaniyani raqamli eshittirish formatiga o‘tish uchun zamonaviy multimedia uskunalari bilan jihozlash maqsadida nol foizlik 22,5 million yevro (302,8 milliard so‘m) kredit ajratilgandi.
Bundan tashqari, kredit muddati 10 yildan 13 yilgacha uzaytirilib, davlat budjetining qarzni qaytarishdagi ulushi oshiriladi.
Dastlab 22,5 million yevro miqdoridagi kredit MTRK va davlat tomonidan teng ulushlarda — har biri 11,25 million yevrodan to‘lanishi rejalashtirilgandi. Ammo bu yillar davomida korxona kredit uchun umuman to‘lamagan va har olti oyda byudjetdan 661,76 ming dollar ajratilgan. “Gazeta.uz”ning yozishicha, endi budjet mablag‘lari hajmi yilning birinchi yarmida 1,03 million yevrogacha oshadi, MTRK esa 2024-yilning ikkinchi yarmidan boshlab 200 ming yevro, keyin esa 100 ming dollardan to‘laydi — 2030-yil oxirigacha jami 1,4 million yevro. Shu tariqa, O‘zbekiston Milliy teleradiokompaniyasiga ssuda uchun davlat byudjetidan 21,1 million yevro (qarzning 93,7 foizi) ajratiladi, bu rejadagidan qariyb 10 million yevroga ko‘pdir.
Eslatib o‘tamiz, 2023-yil uchun MTRKga davlat byudjetidan 555,94 milliard so‘m mablag‘ ajratilishi kerak. 2022-yilda kompaniyaga 463,6 milliard so‘m, 2021-yilda 427,1 milliard so‘m, 2020-yilda 399,5 milliard so‘m budjet mablag‘lari ajratilgan.
Izoh (0)