O‘zbekistonda Yoshlar mediaxoldingini yaratish muhokama qilinmoqda. Unga 46 mlrd so‘m ajratiladi

O‘zbekiston Yoshlar ishlari bo‘yicha agentligi “Yoshlar mediaxoldingi” aksiyadorlik jamiyati faoliyatini tashkil etish chora-tadbirlari to‘g‘risidagi Vazirlar Mahkamasi qarori loyihasini muhokamaga qo‘ydi.

Hujjat bilan uning bazasida quyidagilarni yaratish taklif etilmoqda:

• O‘zbekiston Yoshlar ittifoqi;
• Davlat aktivlarini boshqarish agentligi;
• MTRK davlat ulushini (“Yoshlar” teleradiokanali” aksiyadorlik jamiyatining, “Yosh kuch” jurnalining, “Yoshlar ovozi” – “Molodyoj Uzbekistana” gazetalarining, “Yoshlar” nashriyot uyining 100 foizlik ulushlarini);
• “Mening yurtim” (MY5) telekanalining 61 foizi ulushini;
• “Yoshlar ovozi” radiosining 49 foiz ulushini.

Xolding davlat islohotlarini axborot makonida qo‘llab-quvvatlash, ommaviy axborot vositalarida yoshlarning hayoti, orzu-intilishlari, qo‘lga kiritayotgan muvaffaqiyatlarini keng yoritish, yoshlar hayotida uchrayotgan muammo va kamchiliklarni tahlil qilib, ular yechimiga qaratilgan turkum ko‘rsatuv, maqola va eshittirishlar tayyorlashni yo‘lga qo‘yish maqsadida tashkil etilmoqda.

Mediaxolding va uning tarkibiga kirgan tahririyatlarni davlat budjetidan moliyalashtirish bosqichma-bosqich tarzda kamaytiriladi va 2023-yilga qadar o‘zini o‘zi to‘liq ta’minlashga o‘tkaziladi.

Bir oy muddatda mediaxoldingga qurilish, moddiy-texnik ta’minoti va boshqa xarajatlari uchun 2020-yilda 46 milliard so‘m miqdorida mablag‘ ajratilishini hamda 2021-yil davomida mediakontent (maxsus va axborot dasturlari, ijtimoiy roliklar, intellektual loyihalar va boshqalar) tayyorlash, risola va yosh ijodkorlarning ilk kitoblarini chop etish uchun asoslangan hisob-kitoblarga muvofiq mablag‘ ajratilishi kutilmoqda.

Mediaxolding faoliyatini tashkil etish va rivojlantirish maqsadlarini amalga oshirish ikki bosqichda amalga oshiriladi:

• Birinchi bosqich, 2020—2021-yillar — mediaxolding faoliyatini tashkil etish, moddiy-texnik bazasini shakllantirish, mavjud imkoniyatlarni baholash, rivojlantirish indikatorlarini aniqlash, mavjud aktivlar, muammolar va erishilgan muvaffaqiyatlarni tahlil qilish;
• Ikkinchi bosqich, 2022-yil va undan keyingi davr — mediaxolding va uning tarkibiy bo‘linmalari iqtisodiy mustaqilligini, axborot xizmatlari bozoridagi raqobatdoshligini ta’minlash, tele-radio ko‘rsatuvlar, eshittirishlar, davriy nashrlar va elektron axborot xizmatlarini tashkil etish jarayoniga bozor mexanizmlarini tatbiq etish va mediaxolding va uning tarkibiy qismlari faoliyatini tizimli yo‘lga qo‘yish, ularning moliyaviy to‘liq mustaqilligiga erishish, samaradorligining asosiy ko‘rsatkichlarini baholab borish.

Eslatib o‘tamiz, 30-iyun kuni O‘zbekiston Prezidenti farmoni bilan yoshlar siyosati sohasidagi qonun hujjatlariga rioya etilishi ustidan davlat nazoratini amalga oshiruvchi yangi organ — Yoshlar ishlari agentligi tashkil etilgandi. Yangi agentlik tashkil topganidan keyin Alisher Sa’dullayev agentlik direktori bo‘lishi ma’lum qilingandi.