Isroil armiyasi G‘azo sektorida o‘t ochishni to‘xtatish rejimi buzilgani haqida xabar berdi. Falastinning HAMAS guruhi otashkesim Isroil tomonidan buzilganini ma’lum qildi.
Isroil tomoniga ko‘ra, so‘nggi bir soat ichida G‘azo sektori shimolidagi ikki xil joyda Isroil qo‘shinlari yaqinida uchta portlovchi qurilma ishga tushirilib, otashkesimni buzgan.
“Joylardan birida HAMAS harbiy xizmatchilarga qarata o‘t ochgan, ular ham javoban o‘q uzgan. Hodisa oqibatida bir qancha askar yengil tan jarohati olgan. Ikkala hodisada ham qo‘shinlar operativ pauzaning bir qismi sifatida o‘z o‘rnida bo‘lgan”, — deydi Isroil armiyasi.
O‘z navbatida, HAMAS oliy rahbariyatining vakili Abu Ubeyda buni tasdiqlab, Isroilni sulh bitimini buzganlikda aybladi.
“G‘azo sektori shimolida o‘t ochishni to‘xtatish kelishuvini dushman ochiqdan ochiq buzishi natijasida bizning mujohidlarimiz bu qoidabuzarlik bilan shug‘ullandi. Dushman o‘z majburiyatlarini amalga oshirguncha, biz sulhga sodiqmiz. Vositachilarni bosqinchilarga bosim o‘tkazishga, ularni quruqlikda va havoda sulhning barcha shartlarini bajarishga majbur qilishga chaqiramiz”, — dedi Abu Ubeyda.
Bugun Isroil, AQSH va Misr vakillari G‘azo sektorida o‘t ochishni to‘xtatish rejimini uzaytirish masalasini muhokama qilish uchun Dohaga kelgan.
Izoh (0)