Rossiya prezidenti Vladimir Putin bugun kechqurun kengaytirilgan yig‘ilish o‘tkazadi va unda Maxachqal’a aeroportidagi tartibsizliklarni muhokama qiladi. Bu haqda prezident matbuot kotibi Dmitriy Peskov ma’lum qildi.
Uning so‘zlariga ko‘ra, Putin 29-oktyabr oqshomidan beri FSB, Rossiya gvardiyasi va respublika rahbari Sergey Melikovdan Dog‘istondagi vaziyat haqida batafsil hisobotlarni olishda davom etmoqda.
“Kechagi voqealar tashqi harakatlar natijasi ekanligi hammaga ma’lum va ravshan”, — dedi Peskov.
Shuningdek, u prezident “uchrashuvda G‘arbning Yaqin Sharqdagi voqealardan Rossiya jamiyatini parchalash uchun foydalanishga urinishlarini ham muhokama qilishini” ta’kidladi.
30-oktyabrga o‘tar kechasi Dog‘istonda Isroil samolyotining respublikaga qo‘nishidan norozi olomon aeroportga bostirib kirdi. Ular antisemitizm shiorlarini aytib, uchish-qo‘nish yo‘lagigacha kirib borgan. Tartibsizliklarda 20 dan ortiq odam yaralandi.
Izoh (0)