Rossiyaning Sankt-Peterburg shahri Krasnogvardeyskiy tumanidagi qurilish maydonchasida tuproq ko‘chishi oqibatida o‘zbekistonlik uch ishchi halok bo‘ldi. Bu haqda “78.ru” xabar berdi.
Aniqlanishicha, 27-oktyabr kuni soat taxminan 15:00 da Shafirovskiy prospektidagi krematoriy yonida ekskavator yordamida uzunligi 20 metr, chuqurligi 4 metr bo‘lgan drenaj quvurlari uchun xandaq yotqizilgan. O‘zbekistonlik uch nafar ishchi qazish ishlarini qo‘lda davom ettirgan.
Shu payt xandaq devorlarining biri qulab tushgan, oqibatda ishchilarni tuproq bosgan. Qutqaruvchilar yetib kelguniga qadar uch kishining jasadi yer ostidan chiqarib olingan. Halok bo‘lganlarning bari O‘zbekiston fuqarolari: 33 va 43 yoshda, uchinchisining yoshi aniqlanmoqda. Krasnogvardeyskiy tumani prokuraturasi ishchilarning o‘limi yuzasidan tergov olib bormoqda.
“Dastlabki maʼlumotlarga ko‘ra, xandaq devori qazish vaqtida qulagan. Tekshiruv davomida tashkilot mansabdor shaxslarining mehnatni muhofaza qilish talablariga muvofiqligi nuqtayi nazaridan harakatlariga huquqiy baho beriladi”, — deyiladi xabarda.
Izoh (0)