Falastinning HAMAS harakatining harbiy qanoti bo‘lmish “Izzaddin al-Qassam” brigadasi jangchilari Livan janubidan Isroil hududi tomon 30 ta raketa uchirdi. Bu haqda guruhning Telegram kanalida e’lon qilingan bayonotda aytiladi.
“Raketa zarbasi Falastin shimolidagi bosib olingan Naxariya va Shlomi aholi punktlariga otilgan”, — deyiladi matnda.
Isroil armiyasi HAMASning mazkur raketa hujumi haqida hech qanday ma’lumot e’lon qilmadi. Biroq armiya matbuot xizmatiga ko‘ra, Livan bilan chegara yaqinida joylashgan Betzet, Xanita va Shlomi aholi punktlarida havo hujumi sirenalari bir necha bor yangragan.
Al Jadeed telekanali xabar berishicha, HAMAS harbiy qanoti tomonidan otilgan raketalarning hammasi ham chegarani kesib o‘tgani yo‘q, ularning bir qismi BMTning Livandagi muvaqqat kuchlari shtab-kvartirasi joylashgan hudud yoniga tushgan.
Izoh (0)